Komunidade kbiit laek sira iha Suku Tutuala simu ajudu ne’ebé fahe liuhosi Fundasaun Memoria Konis Santana, sábadu, 13 juñu 2020. Imajen espesiál.

DILI, 16 juñu 2020 (TATOLI)—Prezidente Fundasaun Memória Konis Santana (FMKS), Izaldes Santana, hateten situasaun propagasaun pandemia Coronavirus (COVID-19) halo atividade ekonomika iha Timor-Leste paradu hodi rezulta povu balun ne’ebé laiha kbiit menus ba ai-han.

Tuir komunikadu ne’ebé Agência TATOLI asesu, ohin, Prezidente Fundasaun Konis Santana haktuir, FMKS iha inisiativa apoia nesesidade bázika ne’ebé fundasaun halibur, ba família kbiit laek sira iha Suku Tutuala no Mehara, Postu Admiministrativu Tutuala, Munisípiu Lautein.

Kontribuisaun ne’e, nia informa, mai hosi emprezáriu balun, super merkadu, no Tutuala nia oan sira ne’ebé hela iha Dili, hodi apoiu kbiit laek sira, liuliu komunidade iha Suku Tutuala hamutuk 65, Suku Mehara hamutuk 32 ho totál uma-kain hamutuk 97, inklui uma-kain 25 hosi Postu Administrativu Lospalos iha Suku Bauro.

“Ajudu sira ne’e la’ós mai hosi Governu ka partidu maibé nu’udar inisiativa hosi Fundasaun Memoria Konis Santana, hodi tulun kbiit laek sira iha situasaun pandemia COVID-19 ne’e”, dehan Prezidente FMKS, Izaldes Santana, liuhosi fahe ajudu ne’e iha Suku Tutuala, sábadu (13/06/2020).

Nia haktuir, Fundasaun Memória Konis Santana (FMKS) hetan tulun nesesidade bázika hanesan foos, mina, supermie, susu-been, manu-tolun no seluk tan hosi Super Merkadu Dili Mart, Lita Store, Lucky Market, Jaco Supermerkadu, deputadu Agustinho Sequeira Somotxo, Ana Bela Savio, Cidalia Mesquita no mós família balun hosi Suco Tutuala no Suco Mehara nia  oan sira ne’ebé hela iha Dili.

“Atividade asaun karidade ida- ne’e, organiza ho fuan no laran nu’udar Lospalos oan hodi fó apoiu ba Lospalos oan sira ne’ebé hela iha Tutuala”, nia dehan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here