DILI, 16 juñu 2020 (TATOLI)-Estadus Unidus Amérika liuhosi projetu USAID ho naran Turizmu ba Ema Hotu (TBEH) iha ona inisiativa atu fó apoiu ba Governu no povu Timor-Leste hodi rekupera rendimentu ba setór turizmu hafoin problema pandemia mundiál COVID-19.
Objetivu husi projetu ne’e atu estimula demanda turizmu, ajuda emprezáriu kiik no médiu no liga pioneiru turizmu Timor-Leste nian ba Indústria Turizmu Internasionál.
Bazeia ba análiza husi rejultadu entrevista ho operadór turizmu TL komesa husi Ajénsia luku tasi, Otél, artezenatu sira, TBEH identifika pilar tolu hodi rekupera estratéjia ne’ebé foka ba jestaun no redúz nia impaktu, forñese estimulasaun no aselera rekuperasaun hodi prepara ba futuru.
“TBEH nia idea inklui kampaña doméstiku hodi estimula nesesidade turizmu nian iha nasaun nia laran, estabelese liña konsultivu ida ba negósiu kiik no médiu hodi buka ajuda, kolabora ho instituisaun mikro-finansa hodi asesu ba iha finansiamentu ba negosiu sira ne’e,”dehan Embaixadora EUA, Kathleen M. Fitzpatrick liuhosi komunikadu imprensa ne’ebé maka TATOLI asesu iha segunda ne’e.
“TBEH mós propoin dalan seluk hodi rekoñese destinasaun turizmu ne’ebé iha no rekoñese pioneiru no líder sira ba turizmu komunitáriu,” tenik tan.
Re-inisiu projetu turizmu ba ema hotu hanesan ezemplu ida oinsá EUA bele fó apoiu TL durante hasoru dezafiu COVID-19 no redúz impaktu ba ekonomia inklui indústria turizmu.
“Estadus Unidus komprometidu ba nia apoiu globál no ba Timor-Leste atu adapta ami-nia programa hodi bele hasoru dezafiu ne’e liuhusi kontribuisaun finanseiru ne’ebé mak atinje ona besik miliaun $1 no besik billaun $1 ba mundu tomak,”nia hatutan.
Iha biban seluk, Xefe Ofisiál Ezekutivu East Timor Trading Group no mós Vise Prezidente ba Otél Nain sira iha Timor-Leste, Sam Aluwihare informa nu’udar Empregadór ba ema hamutuk 220 iha Timor-Leste, iha servisu indústria ospitalidade nian fiar EUA hamutuk ho Governu TL liuhosi projetu USAID importante atu revitaliza indústria turizmu iha rai-laran.
“Ne’e importante tebes ba asegura saida mak ita hari’i ona iha tinan 18 nia laran mantein ita-nia ema kontinua iha servisu no re-inísia setór ida-ne’e hodi atinje objetivu nasaun nian ba diversifika ekonomia no atrai turista hamutuk 200.000 iha tinan 2030 mai Timor-Leste,” Dehan nia.
USAID liuhosi projetu TBEH hodi ajuda Ministériu Turizmu, Komérsiu no Indústria atu lori turista Internasionál 200.000 kada tinan to’o 2030 hodi aumenta reseita ba nasaun millaun $ 150 no fó servisu ba Timoroan 15.000.
Jornalista : Hortencio Sanchez
Editór : Agapito dos Santos
