ESTV Becora Instala ekipamentu fase liman hanehan ho Ain. Imajen/ESTV Becora.

DILI, 16 juñu 2020 (TATOLI)-Eskola Ensinu Sekundáriu Tékniku Vokasionál Becora daudaun ne’e instala ona tanke no toneira fase liman ho modelu hanehan uza ain ba prevensaun surtu COVID-19.

Xefe Gabinete Apoiu Tékniku ESTV Becora, Duarte da Costa, profile rua kompleta ho torneira hodi fasilita estudante no profesór sira uza hodi fase liman ba prevensaun no kombate surtu coronavirus.

“Ami instala torneira lima ne’e as metru ida-resin depois ita sama de’it bee sai ona la presija ita ka’er ho liman hodi loke nune’e sabaun  ne’ebé ami prepara ho ninia sistema hanesan hotu,”nia esplika ba Agência TATOLI, iha ninia servisu fatin Becora, ohin.

Tuir esplikasaun husi Ministériu Saúde no Organizasaun Mundiál Saúde (OMS) surtu COVID-19 fasil atu da’et liuhusi kontaktu liman, tanba ne’e ESTV instala fasilidade uza ho ain.

“Iha semana kotuk Diretór,  Adjunto Gabinete Apoiu Tékniku no Profesór sira tau hanoin hamutuk hodi kria modelu foun ida hodi prevene COVID-19 Iha ESTV Becora,”tenik tan.

Kona-ba preparasaun eskola ESTV, nia tenik tan oras ne’e atinje ona pursentu 85.

“Materiál hodi prodúz tanke rua ne’e sosa ho osan konsensaun eskolár tuir orientasaun Ministra Edukasaun Juventude no Desportu nian, tanba ne’e ami hasai metade husi $1034 hodi kompleta ekipamentu sira ne’e,”nia hatutan.

Eskola Ensinu Sekundáriu Tékniku Vokasionál Becora iha Departementu neen ho turma 36 ho totál estudante 1034.

Relasiona ho númeru estudante ne’ebé barak, nia hateten eskola sei esforsu atu jere rekursu ne’ebé iha hodi garantia prosesu aprendijazen ba estudante sira hotu.

Ho nune’e mak parte eskola rasik iha ona ninia polítika atu jere prosesu ensinu aprendijazen ne’e sei hahú uluk ho departementu ida husi klase tolu tomak ba loron rua, depois departementu seluk ba klase rua,  loron rua tuir mai departementu husi klase dahuluk mós loron rua,”dehan Nia.

Jornalista : Tomé Amado

Editór        : Agapito dos Santos

HAKEREK NO HATÁN

Please enter your comment!
Please enter your name here