Sekretáriu Estadu Ambiente, Demétrio do Amaral de Carvalho. Imajen Tatoli/António Gonçalves

DILI, 16 juñu 2020 (TATOLI) – Maski Konsellu Ministru aprova ona Dekretu-Lei kona-ba eliminasaun no importasaun saku plástiku iha loron 4 marsu 2020, maibé to’o agora presiza kompleta parte legál balun molok lori ba Prezidente Repúblika hodi hetan promulgasaun.

“Iha prominór ki’ik-oan ida ka rua ne’ebé parte legál iha Konsellu Ministru tenke halo mudansa molok submete ba Prezidente Repúblika atu halo promulgasaun,” tenik Sekretáriu Estadu Ambiente ba Agência Tatoli, iha ninia kna’ar fatin, Akait, tersa ne’e.

Sekretáriu Estadu ne’e konsidera Projetu Dekretu-Lei ne’e nu’udar inisiativa ida atubele konserva rikusoin biodiversidade.

Notísia Relevante: Governu Aprova Dekretu-Lei Eliminasaun no Importasaun Saku Plástiku

Nune’e, governante ne’e iha esperansa lejizlasaun ne’e bele hetan promulgasaun iha tempu badak atubele implementa planu asaun sira ho efetivu no implementa polítika zero plástiku iha Timor-Leste.

Diploma ne’e buka atu prevene no redús impaktu hosi rezíduu sira ba ambiente, liuliu rezíduu sira hanesan produtu plástiku ne’ebé ho utilizasaun únika.

Nune’e mós kontiúdu lejizlasaun ne’e bandu halo alienasaun, importasaun no produsaun produtu plástiku naun resiklável no bandu atu halo akizisaun, distribuisaun, importasaun no produsaun ba objetu plástiku ruma.

Aleinde ne’e, Diploma ne’e ho prinsípiu fundamentál maka hanesan prekausaun, prevensaun ba dezenvolvimentu sustentável, seguransa ambientál globál, poluidór no re-utilizasaun resiklajen valorizasaun no enerjétika.

Eliminasaun saku plástiku uzu úniku relasiona ho alternativu sira ne’ebé maka halo ona hanesan saku plástiku husi ai-farina ne’ebé empreza Heineke promove ona maibé alternativa seluk hakarak atu enkoraja negosiante ki’ik sira atubele prodús husi matéria orgánika hanesan kohe, bote, no saku sira ne’ebé bele halo ho matéria orgánika.

Dekretu-Lei ne’e nia kontiúdu to’o artigu 80, tanba esplika kona-ba definisaun aspetu sira ne’ebé kontein iha lei-ne’e, inklui dokumentu aneksu ida kona-ba lista sira ne’ebé bele importa no prodús iha Timor- Leste, nune’e mós lista tipu plástiku 800 ne’ebé bele autoriza.

Tipu sira ne’ebé la tama iha lista ne’e, sei labele importa maibé kondisaun esesionál ba ema ka entidade ruma bainhira importa sei hetan taxa ba kustu báziku porsentu 30 husi valór ne’ebé entidade ne’e sosa iha merkadu.

Kona-ba lista plástiku sira ne’ebé bele haruka mai ne’e kímiku hotu maibé nia prinsípiu maka sasán sira ne’ebé bele tama Timor-Leste iha prinsípiu haat hanesan matéria bele dodok iha rai bainhira soe ba rai durante fulan-tolu no bele nabeen, kutun rai sira bele han (biodegradável), bele rahun rasik iha natureza no ida importante maka la kontein materiál kímiku sira ne’ebé fó perigu ba saúde públika no ambiente.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here