Portavóz no Koordenadór Ligasaun Ofisiál ba Forsa Tarefa COVID-19 CIGC , Rui Maria de Araújo. Imajen Tatoli/Egas Cristovão

DILI, 15 juñu 2020 (TATOLI) – Maski Governu deside ona taka fronteira terrestre no iha loron loron 2 juñu foin hahú loke maibé ho limitasaun ba kada semana ida dala ida, iha kuarta durante oras rua nia laran, maibé nafatin iha sidadaun balun ne’ebé tama klandestinamente husi Indonézia mai Timor-Leste. 

Portavóz no Kordenador Ofisiál Ligasaun Forsa Tarefa Sala Situasaun, Sentru Intregradu Jestaun Krize (CIGC, sigla Portugés), Rui Maria de Araújo, informa hahú husi 8 to’o 15 juñu timor-oan na’in-25 maka hakat klandestinamente liuhosi fronteira terrestre. 

Husi totál 25 ne’e kompostu husi na’in-10 iha tama liuhosi territóriu Rejiaun Administrativu Espesiál Oé-cusse Ambeno (RAEOA) iha área Citrana na’in-haat no Oesilo na’in-neen, enkuantu na’in-14 husi Munisípiu Bobonaro iha área Memo no  Tunubibi ema na’in-ualu, Lolotoe na’in-rua, Batugade nain-haat no iha Munisípiu Covalima na’in-ida.

“Ema hirak ne’e hotu oras ne’e daudaun iha hela konfinamentu obrigatóriu atu kompleta loron 14,” tenik Portavoóz liuhosi konferénsia imprensa iha Sala Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Aleinde ne’e, nia dehan fasilidade saúde iha Ministériu Saúde ninia tutela iha territóriu laran tomak sei nafatin hala’o prosesu triajen no vijilánsia sentinela iha períodu estensaun Estadu Emerjénsia hodi bele deteta lalais kazu foun ruma iha komunidade nia le’et.

Nune’e, hahú husi 5 to’o 27 maiu, ekipa vijilánsia rekolla amostra laborátoriu ba ema suspeitu na’in-63 no amostra laboratóriu vijilánsia sentinela hamutuk 820. 

“Amostra hirak ne’e hotu negativu, hahú loron 1  juñu to’o ohin hamutuk hotu rekolla amostra laboratóriu ba ema suspeitu na’in-neen no amostra laboratóriu vijilánsia sentinela hamutuk hotu 181,” nia subliña.

Husi rezultadu ne’ebé Laboratóriu Nasionál Saúde fó sai, iha amostra husi suspeitu na’in-neen maka negativu hotu no amostra husi vijilánsia sentinela 84 maka negativu ka korresponde porsentu 46. 

“Ida ne’e reforsa evidénsia katak to’o oras ne’e Timor-Leste la iha kazu foun no seidauk iha transmisaun iha komunidade,” nia afirma.

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here