Xefe Suku Gricenfor, Francisca Sãozinha de Jesus Brites Boavida. Imajen/Natalino Costa

DILI, 15 juñu 2020 (TATOLI)-Xefe família neen iha Suku Gricenfor, Postu Administrativu Na’in Feto, Munisípiu Dili, segunda ne’e deklara hodi kansela simu subsídiu ne’ebé oferese husi Governu ho motante $ 200 tanba kada fulan sira simu saláriu liu $ 501.

Xefe Suku Gricenfor, Francisca Sãozinha de Jesus Brites Boavida, relata Governu liuhosi Ministériu Solidariedade Sosiál no Inkluzaun (MSSI) no Banku Nasionál Komérsiu Timor-Leste (BNCTL-sigla portugés) halo ona pagamentu benefisiáriu uma-kain 250 komesa iha segunda semana kotuk no sei ramata iha segunda (15/06/2020).

Antes ne’e, nia parte submete ona lista família hamutuk 273 ba Ministériu Administrasaun Estatál (MAE),  maibé aprova de’it 250, enkuantu 23 la aprova.

Família sira ne’ebé la konsege hetan pagamentu, daudaun ne’e halo ona reklamasaun hodi hetan sira-nia diretu iha faze tuirmai.

“Hosi Aldei Sentrál uma-kain 47 mak simu ona no hela na’in haat sira rasik deklara halo kanselamentu tanba saláriu liu $501, Aldeia Grilhos família 64 mak simu ona, na’in hitu ba simu fali iha suku seluk, na’in rua kansela no Aldeia Formosa 126 mak simu ona subsídiu,” dehan, Francisca Sãozinha de Jesus Brites Boavida, ba Agência TATOLI, iha Sede Suku Gricenfor, ohin.

Prosesu pagamentu hahú semana kotuk to’o segunda ne’e la’o di’ak no kumpre nafatin distansiamentu fiziku hodi halo prevensan ba transmisaun surtu COVID-19.

“Iha ne’e buat hotu la’o di’ak la hanesan suku sira seluk ne’ebé ema sena malu, maibé komunidade sira mak halo ami-nia ulun moras oituan ami avizu tama sai uma mós sira balu lakohi mai simu sira nia osan, obriga mak foin mai no ohin loron ikus ona atu halo pagamentu iha Suku ne’e,”tenik Xefe Suku ne’e.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here