Komunidade sira hahú simu ona subsídiu $200 husi Governu. Imajen/Antonio Goncalves

DILI, 15 juñu 2020 (TATOLI)–Governu liuhosi Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, husu ba ema hotu-hotu atu asegura osan ne’e tanba prosesu pagamentu ida-ne’e iha risku ba osan.

Notísia Relevante: Loron Daneen, Benefisiáriu 173.186 Simu Ona Subsídiu

Nia hatutan, públiku mós kestiona maka’as kona-ba pagamentu ne’e halo kleur tanba hodi nune’e para ekipa pagamentu sira-nia perdiem aumenta ne’e, ne’e la loos. 

“Ha’u sente katak iha públiku mós kestiona maka’as kona ba pagamentu ne’e dehan lentu, hodi nune’e para sira nia subsídiu aumenta, ne’e la loos. Ami la hanoin to’o iha ne’ebá, ami hakarak lalais liu, di’ak liu tanba ne’e risku, Prosesu pagamentu iha Risku, ita hotu hakarak asegura osan ne’e entaun MSSI hakarak ne’e finaliza lalais pagamentu ne’e,” Diretór Rui Manuel Gago Exposto ba jornalista sira iha salaun MSSI, Caicoli, Dili, segunda ne’e. 

Nia hateten, bazeia ba diploma ministeriál númeru 49 katak dadus mai hosi xefe suku no xefe aldeia sira, depois hato’o ba Munisípiu hafoin submete ba Ministériu Administrasaun Estatál (MAE).

Agora mosu problema ne’e, nia dehan, MAE hatene no sira labele hatudu fali ba MSSI tanba rekezitu no kritériu saida mak presiza hodi hetan fixa família ne’e, autoridade sira mak hatene no labele hatudu liman ba MSSI de’it. 

“MSSI hetan dadus hosi MAE. MSSI lahetan dadus direta hosi komunidade maibé MSSI hetan dadus hosi MAE. Tanba ne’e, husu atu labele hatudu liman ba ema ida de’it,” dehan diretór ne’e.

Nia informa, ekipa pagamentu ne’ebé servisu iha Munisípiu Dili lahetan buat ida maibé sira hetan mak hahan loron ida-nian de’it para bele atende komunidade sira.

“Ha’u-nia ekipa ne’ebé servisu iha Dili lahetan buat ida hosi ne’ebá. Sira hetan mak hahan loron ida-nian para sira atu han hodi atende ba komnunidade sira iha prosesu pagamentu ne’e,” nia dehan. 

Tanba ne’e, nia husu ba komunidade sira katak bainhira fó komentáriu kona-ba prosesu pagamentu karik, favór ida kruza uluk lai informasaun sira para depois mak hatudu liman de’it ba ema ida, ne’e ladún di’ak.

“Ha’u hanoin atu dezenvolve nasaun ne’e ita hotu-hotu nian no presiza hotu-hotu nia kontribuisaun ba Estadu ne’e,” nia hateten. 

Komesa ohin, MSSI reforsa ona ba iha ekipa pagamentu iha suku Bairru Pite (3), Comoro (3), Madohi (2), Manleuana (2) no aban ekipa pagamentu sei apoiu ba iha Munisípiu Dili tanba iha Munisípiu balun finaliza ona nune’e bele aselera tuir kalendáriu pagamentu.

Oráriu real pagamentu ba subsídiu $200 ne’ebé mak Ministériu Solidaridade Sosiál fó sai katak iha oras 8:00-12:00 no lorokraik hahú iha oras 13:00- 17:00.

Husu xefe suku no xefe aldeia no mós ba komunidade sira nia komprensaun katak oráriu ne’e hala’o para asegura mós seguransa ba pesoál pagamentu ne’e rasik inklui ba seguransa ba osan ne’ebé mak rai iha suku ne’e.

“Karik ha’u-nia pesoál sira mak halo pagamentu kleur ka lentu, ha’u husu ba komunidade sira tau pasiénsia tanba ita presiza asegura osan nune’e osan ne’e labele lakon,” nia esklarese tan.

Jornalista : Osória Marques

Editór     : Cancio Ximnese

HAKEREK NO HATÁN

Please enter your comment!
Please enter your name here