Ambiente iha sala plenáriu Parlamentu Nasionál. Imajen Tatoli/Egas Cristovão

DILI, 15 juñu 2020 (TATOLI) – Hafoin liuhosi diskusaun iha plenária, ikusmai Parlamentu Nasionál (PN) aprova pedidu debate transferénsia estraordinária husi Fundu Petrolíferu ho karatér urjénsia, ho rezultadu votu a-favór 43, abstensaun ida, no kontra 16.

Pedidu Governu ba transferénsia estraordinária husi Fundu Petrolíferu ho montante millaun $286,8 hodi reforsa saldo tezouru inklui reforsa Fundu COVID-19 ne’ebé la sufisiente atu kobre despeza pakote ekonómiku sira ne’ebé mak aprovadu ona iha Konsellu Ministru.

Hafoin pedidu ne’e pasa, hatun kedas ba Komisaun C ne’ebé trata asuntu Finansa Públika hodi hahú audiénsia ho Governu iha aban (tersa) durante loron-rua tuir kalendériu.

Notísia Relevante: Govenu Aprova Proposta Pedidu Levantamentu Millaun $286,8 Husi Fundu Petrolíferu

Prezidente Parlamentu Nasionál, Aniceto Guterres husu ba deputadu Komisaun C atu utiliza loron-rua ne’e ho másimu, nune’e bele konklui lalais.

“Husu ba komisaun C atu utiliza plenáriu hahú aban hodi hala’o audiénsia ho Governu ba pedidu ne’e, tanba tuir kalendáriu ne’ebé komisaun C aprova katak audiénsia ho Governu hahú aban no sei realiza iha sala plenária”, dehan Aniceto.

Prezidente Komisaun C, Angélica Rangel, informa katak komisaun ne’e finaliza ona kalendériu ba audiénsia ho Governu no atribui ona konvite ba ministériu relevante sira hodi partisipa iha audiénsia iha Parlamentu.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here