Komísariu CAC, Sergio Hornai (klaran) no Inspetór Jerál Estadu, Francisco de Carvalho, hamutuk Provedora Direitu Umanu no Justisa (PDHJ), Jesuína Maria Ferreira Gomes halo konferensia imprensa iha edefísiu CAC, Dili, Segunda (15/06/2020). Imajen/Egas Cristóvão

DILI, 15 juñu 2020 (TATOLI) –Durante prosesu pagamentu subsídiu $200 ba kada família uma-kain  iha Dili laran ho mós iha munisípiu sira, husi loron 09 to’o 13 juñu 2020, mosu violasaun hasoru prosedimentu prevensaun COVID-19.

Notísia Relevante : Ekipa Anti-Korrupsaun Deteta Irregularidade Durante Pagamentu Subsídiu $200

Ekipa Anti-Korrupsaun ne’ebé hala’o monitorizasaun no akompañamentu iha terrenu kona-ba prosesu pagamentu subsídiu ne’e haree katak durante ámbitu pagamentu subsídiu ne’e komunidade sira (benefisiáriu) la  kumpre distánsia fízika, la uza máskara no iha fatin balun la prepara sabaun ho bee atu fasilita komunidade fase-liman.

“Husu ba komunidade ka benefisiáriu atu kumpre regra distansiamentu sosiál, uza máskara no kumpre medida prevensaun COVID-19,” hateten Komisáriu CAC, Sergio Hornai, liuhusi konferénsia imprensa, ohin, iha edifísiu CAC, Faról, Dili.

Ekipa Anti-korrupsaun ne’e, kompostu husi Komisaun Anti-Korrupsaun (CAC), Provedoria Direitu Umanu no Justisa (PDHJ), Inspektór Jerál Estadu (IGE), Komisaun Funsaun Públiku (CFP) no rede sosiedade sivíl (Forum ONG Timor-Leste, Judicial System Monitoring Program no seluk tan).

Ekipa Anti-korrupsaun mós nota katak ekipa tékniku sira ne’ebé envolve iha halo pagamentu ne’e la kria mekanizmu própriu ida atu gia oinsá mak benefisiáriu sira tenke kumpre regra medida prevensaun COVID-19 no  ekipa tékniku sira la introdús uluk regra no padraun kona-ba prevensaun COVID-19 ho protokolu distansiamentu sosiál antes hahú pagamentu.

“PDHJ, CAC, IGE no CFP hamutuk ho rede sosiedade sivíl observa katak iha suku balun iha dadeer, sira aviza ba benefisiáriu sira atu kumpre distansiamentu sosiál, maibé iha fatin balun la iha informasaun ruma klaru kona-ba prevensaun COVID-19 nian,” afirma Sergio Hornai.

 PDHJ, CAC, IGE, CFP ho rede sosiedade sivíl  mós observa katak ekipa anti-korrupsaun  la haree profisionál saúde sira destaka iha sentru ka fatin pagamentu sira atu introdús protokolu prevensaun COVID-19 ba benefisiáriu ka komunidade.

“Benefisiáriu sira maioria la uza máskara no la iha fatin ba fase liman no so iha de’it fatin ida-rua mak Xefe Suku sira esplika kona-ba distansiamentu sosiál, fahe máskara no introdús prosedimentu a prevensaun Covid-19 nian,” Sergio Hornai hatete.

Ekipa Anti-korrupsaun husu ba ministériu kompetente atu kria fasilidade medida protokolu preventiva no komunidade hotu atu mantén medida prevensaun COVID-19 ho estadu emerjénsia nian.

Jornalista   : Nelson de Sousa

Editór        : Francisco Simões

 

 

HAKEREK NO HATÁN

Please enter your comment!
Please enter your name here