Portavóz no Koordenadór Ligasaun Ofisiál ba Forsa Tarefa COVID-19 CIGC , Rui Maria de Araújo. Imajen Tatoli/Egas Cristovão

DILI, 15 juñu 2020 (TATOLI) – Kazu konfirmadu ne’ebé rejistadu iha Timor-Leste konsidera hanesan kazu importadu husi sidadaun ne’ebé halo viajen husi nasaun afetadu COVID-19, tama mai Timor-Leste liuhosi dalan fronteira terrestre no aeroportu.

Portavóz no Koordenadór Ofisiál Ligasaun Forsa Tarefa COVID-19 Sala Situasaun Sentru Integradu Jestaun Krize (CIGC, sigla portugés), Rui Maria de Araújo, hateten maski to’o oras ne’e seidauk rejista transmisaun iha komunidade, maibé nia apela atu nafatin kuidadu tanba Timor-Leste besik nasaun ho númeru kazu konfirmadu ne’ebé kada loron sempre aumenta.

“Evidensia hatudu seidauk iha transmisaun COVID-19 iha komunidade nia le’et. Ida-ne’e signifika, posibilidade atu mosu fali kazu foun iha Timor-Leste ka fenómenu ne’ebé teknikamente koñesidu ho termu segunda vaga ka laloran daruak, sei liuhosi ema ne’ebé maihusi nasaun afetadu no iha ona transmisaun iha komunidade nia le’et,” tenik Portavóz CIGC liuhosi konferénsia imprensa iha Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Nia dehan, haree ba kazu foun ne’ebé mosu kada loron iha mundu tomak rejista husi loron 13 to’o 14 juñu mosu kazu foun hamutuk 142.672, iha nasaun afetadu hanesan Indonézia husi loron 13 to’o 14 juñu mosu kazu foun hamutuk 1.014 no iha Timor Osidentál ne’ebé viziñu ho Timor-Leste mosu kazu foun ida, ho totál konfirmadu to’o oras ne’e hamutuk 108, maski área sira ne’ebé halo fronteira direta ho Timor-Leste seidauk iha kazu kazu konfirmadu.

Nune’e mós seluk ne’ebé iha ligasaun viajen ho Timor-Leste hanesan Austrália, husi loron 13 to’o 14 juñu mosu kazu foun hamutuk 12, Singapura hamutuk 347, Malázia hamutuk 43, Korea hamutuk 34.

“Dadus hirak ne’e hotu fó hanoin mai ita katak risku atu mosu laloran daruak COVID-19 iha Timor-Leste nafatin iha bainhira iha ema halo viajen husi fatin afetadu mai Timor-Leste,” nia akresenta.

Eis Ministru Saúde ne’e salienta, iha sorin seluk, tenki rekoñese katak Timor-Leste labele indefinidamente taka nia-an ba viajen husi ka ba rai-seluk, tanba ne’e nia apela atu kontinua aplika medida saúde públika hanesan halo distansiamentu sosiál, individuál ka kuarentena ho izolamentu atubele deteta no kontein surtu ne’e.

Hafoin CIGC deklara pasiente konfirmadu no provável rekuperadu hotu ona iha loron 15 maiu, Governu husi faze ne’ebé hanaran alerta 3 ka faze mitigasaun, hahú adopta fali faze alerta ida ka faze kontesaun hodi luta kontra surtu COVID-19.

Hafoin Timor-Leste rejista kazu pozitivu dahuluk iha 21 marsu 2020, kazu ikus liu rejista iha 24 abríl, nune’e totál konfirmadu ikus na’in-24 no provável na’in-haat.

Jornalista: Florêncio Miranda Ximenes
Editora: Julia Chatarina

HAKEREK NO HATÁN

Please enter your comment!
Please enter your name here