Ministra Edukasaun, Juventude no Desportu (MEJD), Dulce de Jesus Soares Hamutuk ho Estudante Eskola Ensinu Pre-Eskolar 12 Outubro Tasi Tolu. Imajen/Tatoli

ERMERA, 15 juñu 2020 (TATOLI)-Governu liuhosi Ministra Edukasaun Juventude no Desportu, Dulce de Jesus Soares, segunda ne’e ofisialmente re-abertura prosesu aprendijazen ba estudante sira iha eskola Ensinu Báziku Filiál 244 Matata Postu Administrativu Railaco Munisípiu Ermera, tanba kumpre ona padraun ba prevensaun surtu COVID-19.

“Orgullu bo’ot ida ba ha’u mak eskola ne’e bele jere ninia sistema ida di’ak tebes, ha’u haree kondisaun limitadu, maibé koordenadór hamutruk ho profesór  sira bele esforsu hodi hetan bee ba labarik atu fase liman,” dehan, Dulce de Jesus Soares, ba jornalista sira iha Matata Railaco, ohin.

Maske eskola ne’e lokaliza iha área rural maibé, eskola ne’e kria kondisaun hodi liliu instala torneira fase  liman, estudante sira uza máskara, ambiente eskola moos no seguru, mantein distansia fiziku iha eskola no seluk tan.

Vizita ohin, parte ida atu MEJD no MS halo verifikasaun ba kondisaun eskola idaidak hodi kumpre padraun Ministériu Saúde nian atu oinsá halo prevensaun ba transmisaun COVID-19.

“Ami mai akompaña de’it husi parte Ministériu Saúde nian atu halo verifikasun ami la interven, maibé, ekipa Ministériu Saúde mak sei observa direita eskola ne’e ninia preparasaun realidade buat  hotu kompleta ona no sira hateten ekola ne’e bele re-ativa,”tenik Dulce.

MEJD  mós sei distribui máskara hamutuk 304 ba iha eskola refere hodi fasilita estudante sira durante prosesu aprendijazen.

Iha sorin seluk, Responsavel Programa Saúde Ambientál Munisípiu Ermera, Jhony Alves dos Santos, informa eskola Ensinu Báziku Filiál Matata prienxe ona padraun husi Ministériu Saúde.

“Ami haree estudante sira uza hotu máskara, distansia sosiál iha uala limita ona estudante, eskola ne’e iha kondisaun moos husi sala laran sai to’o liur, eskola ne’e iha lixeiru jéral ida no espesifiku mós ami haree monta iha sala oin,”nia esplika.

Aleinde ne’e prepara mós balde instala ho torneira hodi fasilita estudante kada sala atu fase liman durante prosesu aprendijazen la’o.

Ikusliu Koordenadór EBF 244 Matata Railako,  Manuel Salsinha, agradese ba Governu tanba bele fó ona autorizasaun hodi re-ativa prosesu aprendijazen ba alunu sira.

“Ha’u promete sei jere eskola ne’e ho didiak hodi kontinua halo prevensaun ba Coronavirus,” nia hateten.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here