Estudante ESG 4 Balide. Imajen: Rafy Belo

DILI, 15 juñu 2020 (TATOLI)–Eskola Sekundária Jerál (ESG, sigla portugés) 04 Setembru Balide hahú instala ona tanki ba bee no kompleta ho sabaun, tuir padraun Organizasaun Mundiál Saúde (OMS) no Ministériu Saúde (MS), ba estudante no manorin na’in sira, hodi hein despasu husi Ministériu Edukasaun, Juventude no Desportu (MEJD) bainhira reativa ensinu aprendizajen iha périodu krize sanitária ne’ebé mak provoka husi COVID-19 ne’e.

“Bele dehan atinji ona 75%. Durante ne’e, eskola mós sempre kumpre avizu ne’ebé mak fó sai husi Ministériu Edukasaun no mós Ministériu Saúde. Ho ida-ne’e, ha’u bele dehan eskola agora prepara daudauk bee hodi fase liman ho sabaun. Porfil ida ba estudante ho torneira ualu, ba profesór sira porfil ida ho torneira tolu,” Diretór Sergio A. da Cruz informa ba Agência TATOLI iha nia knaar fatin ESG 4 Setembru Balide, segunda ne’e.

Alende ida ne’e, tuir ezekutivu ne’e katak iha parte toilet nian mós sira hadi’a foun hotu kedas para evita moras sira hodi hada’et tutan ba estudante sira bainhira partisipa iha atividade létiva sira.

“Iha turma-laran sira, horsehik ha’u fó orientasaun ba sira cleaner (pesoál limpeza) para sar, fase ho bee, lori hena hamoos kadeira ain sira hotu. Depois ho eskola nia oin no kotuk nahe hotu semente atu nune’e estudante sira tama mai eskola, mai iha fatin ne’ebé seguru no fatin ne’ebé bele garantia katak sira la hetan problema kona-ba moras,” edukadór ne’e haktuir.

Manorin na’in ne’e relata mós katak estudante ativu iha ESG 04 Setembru Balide hamutuk 3.800 resin. Maneira ida atu bele halo distansiamentu fíziku ba estudante sira iha eskola ne’e iha prosesu aprendizajen, parte eskola halo koordenasaun atu iha posibilidade katak iha semana ida, estudante 25 mak simu matéria nune’e mós ba semana seluk tutuir malu, atu nune’e bele ona responde dadauk nesesidade estudante sira nian.

“Ami preokupa liu mak ba sira ne’ebé besik désimu segundu ano. Ne’ebé, ohin ami (profesór sira) tuur hamutuk ko’alia. Tanba ne’e, iha ne’e ha’u bele dehan, ami prepara de’it, ami hein bainhira loos mak Ministériu Edukasaun fó despasu ruma mai para bele dehan ami-nia eskola ne’e bele garantia ona prosesu aprendizajen atu bele la’o, ami bele la’o dadauk,” nia dehan.

Kona-ba aAi-moruk atu rega sala-de-aula laran ne’e, nia dehan, parte eskola presiza husu ba Ministériu Edukasaun atu bele tulun no mós karik masker (máskara) ba estudante rihun resin atu uza  maibé osan la to’o. Tan ne’e, nia husu ba inan-aman sira atu koopera.

“Husu ba inan-aman sira atu koopera hamutuk ho eskola hodi salva ita-nia oan sira hosi COVID-19. Ha’u sente ita mós bele suku de’it. Se hakarak sosa bele sosa. Importante buat ne’ebé ita halo ne’e la’ós ba ema seluk. Labarik sira ne’e mak futuru ba nasaun no futuru ba família uma-laran,” nia dehan.

Diretór Sergio A. da Cruz haktuir, foin daudaun sira ba tuir enkontru iha Eskola Nú Laran, Ministériu Edukasaun, Juventude no Desportu (MEJD) iha tiha ona kooperasaun ho Organizasaun Naun-Governamentál no entidade relevante balun atu apoiu máskara no nesesidade eskolár no saúde balun.

Maibé, nia hatutan, parte eskola no inan-aman sira labele hein demise maibé i’ak liu se inan-aman sira sente bele, mai hamutukita nafatin hodi oferese estudante sira atu bele mai eskola ho di’ak.

“Osan husi Ministériu Edukasaun liuhusi fundu eskolár mós mai atu uza ba nesesidade eskola liuliu atu halo ambiente eskola moos, halo bee fase liman no oinsá bele seguru iha prosesu aprendizajen,” nia esplika.

Seidauk iha funsionáriu administrasaun

Eskola 4 Setembru Balide to’o agora seidauk iha funsionáriu ba administrasaun. Maske nune’e eskola ne’e kolabora mós ho parte seguransa eskola nian balun atu bele apoiu atividade administrasaun eskola ne’e. Nune’e mós fó konfiansa ba profesór na’in tolu iha estabelesimentu ensinu ne’e atu bele ajuda iha área administrasaun eskola nian.

“Totál profesór sira iha eskola ne’e rasik hamutuk 106. Ne’e kompostu ona husi profesór permanente, kontratadu no mós tempu parsiál,” Diretór Sergio A. da Cruz revela.

Nia fó sai mós katak pesoál limpeza iha eskola ne’e hamutuk na’in lima no seguransa mós na’in lima. Seguransa nia objetivu mak oinsá atu organiza estudante sira bele tama iha aula laran; labele sai ba mai no pesoál limpeza sira-nia knaar mak hamoos turma-laran, hamoos ambiente eskola nian.

“Eskola públiku ne’ebé iha cleaner, ha’u sente Eskola 4 Setembru de’it,” Diretór Sergio A. da Cruz hateten ho orgullu.

Ezekutivu ne’e realsa tan: “Cleaner ha’u monta ne’e atu fasilita labarik sira (estudante) tanba ha’u haree, antes ha’u atu sai diretór, ha’u haree labarik sira pikete ne’e, balun hela dook, karreta la iha mai tarde. Agora sira mai tarde, sira halo tan limpeza, entaun tempu ba prosesu aprendizajen ne’e ita na’ok tan lubuk ida. Entaun, biban ha’u sai lideransa ne’e, ha’u haree buat sira ne’e hotu.

Lider másimu Eskola 4 Setembru Balide ne’e informa katak fundu ka orsamentu hodi fó insentivu ba pesoál limpeza sira, seguransa ne’e kontribuisaun másima husi inan-aman estudante sira nian. “Ami fó hanoin ba inan-aman sira, fulan ida sira fó kontribuisaun 50 sentavu”.

Sentavu 50, tuir manorin-na’in ne’e, alende hanesan fó insentivu ba ba pesoál limpeza sira no seguransa sira maibé hodi selu mós profesór tempu parsiál sira ne’ebé eskola ne’e bolu tuir méritu profesór idaidak nian no nesesidade eskola nian hodi fasilita atividade létiva sira.

“Sira (profesór) tempu parsiál ne’e iha na’in hitu. Ami selu tuir oras. Orsamentu estudante sira nian tama hotu mai ami sura totál 3.800 itál, 50 sentavu vezes estudante ne’e hetan hira. Agora aloka ba profesór sira, pelumenus sura tuir oras karik profesór ne’e fulan ida merese hetan hira bazea ba iha totál oras hanorin. Sira cleaner no seguransa nian ami selu tuir saláriu maten, bele dehan kooperasaun ida husi fuan ba fuan. Selu tuir regra SEFOPE, ami sente ami osan la to’o,” esplika edukadór ne’e.

Notísia relevante:CSIL Hahú Kria Kondisaun Molok Reativa Atividade Létiva

Jornalista       : Evaristo Soares Martins

Editór             : Cancio Ximenes

HAKEREK NO HATÁN

Please enter your comment!
Please enter your name here