Portavóz no Koordenadór Ligasaun Ofisiál ba Forsa Tarefa COVID-19 CIGC , Rui Maria de Araújo. Imajen Tatoli/Egas Cristovão

DILI, 15 juñu 2020 (TATOLI) – Hafoin Timor-Leste rejista kazu pozitivu COVID-19 dahuluk iha 21 marsu 2020, kazu ikus liu ne’ebé Sala Situasaun Sentru Intregradu Jestaun Krize (CIGC, sigla Portugés) deklara iha loron 24 abríl ho totál konfirmadu ba loron ikus ne’e hamutuk na’in-24 no provável na’in-haat.

Portavóz no Koordenadór Ofisiál Ligasaun Forsa Tarefa COVID-19 CICG, Rui Maria de Araújo, hateten iha loron 52 ona maka Timor-Leste la deteta kazu foun ba COVID-19.

“Ita tama ona loron 52 ne’ebé Timor-Leste hahú husi fulan kotuk to’o agora laiha deteta kazu foun,” tenik Portavóz liuhosi konferénsia imprensa iha Sentru Mídia COVID-19, iha Sentru Konvesaun Dili (CCD, sigla portugés), segunda ne’e.

Totál kumulativu ezame laboratóriu to’o ohin loron hamutuk na’in-1.833 no totál kumulativu rezultadu laboratóriu negativu na’in-1.809.

Totál ema ne’ebé sei iha konfinamentu obrigatóriu hamutuk na’in-73, kompostu husi na’in-49 iha Dili no 23 iha Oé-cusse, enkuantu ema ne’ebé sei iha auto-kuarentena hamutuk na’in-48 kompostu iha Dili iha na’in-27, Bobonaro 20 no Oé-cusse na’in-ida.

Total ema ne’ebé liu ona períodu konfinamentuobrigatóriu durante loron 14 hamutuk na’in-2.457, kompostu husi munisípiu na’in-522 no iha munisípiu Dili na’in-1.935.

Portavóz relata, Timor-Leste laiha kazu foun no seidauk iha evidénsia kona-ba transmisaun iha komunidade, tanba ne’e CIGC apela ba populasaun tomak, liuliu ba joven sira atu kumpre nafatin disiplina no medida sira ne’ebé estabelese ona husi Organizasaun Mundiál Saúde (OMS) no Ministériu Saúde (MS) kona-ba distansiamentu sosiál koletivu inklui medida protesaun individuál no ijiene liman-nian.

Tuir nia, medida hirak ne’e tenke sai parte husi idaidak ninia komportamentu loron-loron, nu’udar prátika ne’ebé matenek-na’in sira hanaran normalidade foun.

“Normalidade foun signifika ita tenke hatoman-an moris ho toman foun balun ne’ebé moras COVID-19 husik hela mai ita hanesan dahuluk hamriik do’ok husi ema seluk ho mínimu metru ida ho balun, kumprimenta malu la presiza bensa liman, la presiza kaer-liman, la presiza haku’ak-malu ka rei-malu, uza máskara, fase-liman beibeik ho sabaun ka uza dezinfetante liman-nian no ikus liu mak  la presiza sai husi uma bainhira la presiza tebes,” Portavós Sala Situasaun apela.

Nia subliña, bainhira sidadaun hotu hala’o medida hirak ne’e ho disiplina, maka normalidade foun mak xave ba sidadaun hotu atu kontribui ba an rasik, família no viziñu sira iha bairru ka servisu fatin, no mós Timor-Leste tomak hodi nafatin do’ok husi moras COVID-19.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here