Madalena Hanjam. Foto espesiál

DILI, 15 juñu  2020 (TATOLI)–Crus Vermelha Timor-Leste (CVTL) husu orsamentu $2000.000 ba Governu hodi responde ba proposta hosi komunidade nian hamutuk 400.

Prezidente CVTL, Madalena Hanjam, hatetetn hosi proposta hirak ne’e, CVTL hala’o ona 140 projetu no restu CVTL sei husu Governu bele atua tanba orsamentu la boot.

“Bainhira millaun rua ($2000.000) ne’e mak Governu fó entaun ita responde proposta ba proposta hosi komunidade nian hamutuk 400 ne’ebé komunidade fó tiha ona ba CVTL,” dehan Prezidente CVTL, Madalena Hanjam, ba jornalista sira iha MSSI, Caicoli, Dili, segunda ne’e. 

Aleinde ne’e. nia hateten CVTL hanoin atu halo uma ba kbiit la’ek sira no nutrisaun inklui hakiak animál.

Tuir Prezidente CVTL ne’e hateten, ohin mai partilla informasaun kona-ba oinsá mak bele apoiu povu liuliu povu ne’ebé mak vulneravél liu durante iha situasaun COVID-19 ne’e.

“Depois ita haree kontinuasaun saida mak ita bele hala’o ba iha futuru. Aleinde ne’e, ita haree katak orsamentu ne’ebé mak komunidade simu ona maibé CVTL hetan ema barak mak mai ho susar bá hahan. Nune’e CVTL nia servisu mak apoiu sasan ne’ebé la’ós aihan,” Prezidente CVTL haktuir.

Tanba ne’e, CVTL husu ba Governu atu tau atensaun aleinde subsídiu $200 tenke ho mós hahan ne’ebé iha nutrisaun di’ak hodi bele sustenta nafatin ba komunidade durante tempu naruk ba Estadu Emerjénsia ne’e.

Governu, nia dehan, tenke hanoin atu kontinua fó fila fali fós, foremungu ho mina hodi fó unanimidade ba komunidade. Tanba, sira simu tiha osan maibé laiha hahan mós ladún di’ak, se iha ona osan entaun tenke kompleta tan ho hahan.

Nia hateten, Governu buka aihan ba povu entaun tenke buka tan bee-moos ba povu, tanba komunidade sira kontinua husu tuir CVTL nia planu hodi dada bee-moos ba komunidade sira ne’e bainhira no iha ne’ebé.

Orsamentu iha tempu badak mak defisil, nia dehan, entaun iha tempu badak mós buka aihan hodi sustenta povu maibé iha tempu naruk CVTL hanoin dada bee-moos ba povu nune’e sira bele komsumu.

“Tanba ne’e ha’u husu asuntu refere ba Vise-Primeira Ministra no exelénsia dehan labuat ida ,bele hala’o hosi MSSI atu aloka orsamentu direitu ba CVTL atu kontinua dada bee-moos ba povu iha área rurál. Sira ne’e presiza duni bee tanba durante ne’e sira hemu de’it udan-been no bee mota nian,” nia dehan. 

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here