LIQUIÇA,16 juñu 2020 (TATOLI)-Colégio de Santo Inácio Loiola (CSIL-sigla portugés), Kasait Munisípiu Liquiça hetan ona autorizasaun husi Governu liuhosi Ministériu Edukasaun Juventude no Desportu (MEJD), atu hahú re-ativa prosesu aprendijazen ba estudante sira iha kuarta (17/06) ne’e.
Diretór CSIL, FR.Roberto Maaghop Boholst, informa CSIL prienxe ona padraun ba prevensaun surtu COVID-19 ne’ebé prodúz husi Governu hodi instala ona tanke bee moos no torneira, kria distansimentu fiziku iha sala aprendijazen no seluk tan.
“Ita-nia Ministra Edukasaun ohin mai vizita ona ami-nia eskola no nia rasik haree saida mak ami prepara ona, nia rasik ofisialmente hateten ami-nia eskola prienxe ona kriteria sira tanba ne’e ami bele re-ativa prosesu aprendijazen sira,” dehan Diretór CSIL ne’e ba jornalista, segunda ne’e.
Dirijente ne’e dehan tanba ne’e iha tersa ne’e sei halo enkontru ho motorista sira kona-ba padraun prevensaun COVID-19 liliu mantein distansiamentu fiziku bainhira tula estudante sira lori bá eskola.
Colégio de Santo Inácio Loiola iha estudante hamutuk 796, kada sala akumula estudante 40 tanba sala ho medida boot. CSIL iha sala hamutuk 20 ho profesór 35 no funsionáriu administrasaun no tékniku 25.
Entretantu, bazeia ba rezultadu supervizaun ne’ebé halo husi Ministériu Edukasaun Juventude no Desportu no Ministériu Saúde, iha segunda ne’e fó ona autorizasaun ba Eskola Ensinu Báziku Filiál Matata Postu Administrativu Railaco Munisípiu Ermera, no Eskola Colégio de Santo Inácio Loiola atu hahú re-ativa prosesu aprendijazen durante semana ida ne’e.
Jornalista : Tomé Amado
Editór : Agapito dos Santos
