Plantasaun Kafé. Imajen/Timor-Leste Tourism

DILI, 15 juñu 2020 (TATOLI) – Diretór Agro-Komériu, Ministériu Agrikultura no Peska (MAP), Fernando Egidio Amaral, informa iha tinan ne’e atividade esportasaun kafé menus tanba nasaun barak maka deside taka aeroportu no fronteira terrestre tanba pandemia COVID-19, tanba ne’e stock kafé ne’ebé iha la konsege hotu iha tinan klaran ne’e.

“Difísil kompradór kafé atu sosa kafé husi povu agrikultór sira, tanba bainbain iha abríl iha kontratu entre kompradór ho ajénsia esportadór atu deside tarifa sosa kafé, maibé tanba pandemia ne’e kompradór iha Dili seidauk konsege sosa hotu kafé ne’ebé iha no halo stock kafé ne’ebé esportadór iha la konsege hotu iha tinan 2020 klaran tanba nasaun hotu deside lockdown. Fatin kafé no restaurante barak maka taka tanba labele absorve merkadu internasionál,” tenik Dirijente ne’e ba Agência Tatoli, via telefónika, segunda ne’e.

Nia relata, kada tinan ajénsia esportasaun sira, liuliu hanesan Cooperativa Café Timor (CCT) no seluk tan sosa kafé kulit mean iha Munisípiu Ermera, Liquiçá, Manufahi, Ainaro no Aileu hodi prosesa no esporta ba rai-li’ur entre tonelada 6.000 to’o 9.000, maibé tinan ne’e esportasaun la to’o númeru hanesan bainbain.

Tuir nia, esportasaun kafé ba estranjeiru liuhosi dalan rua hanesan fronteira terreste husi Atambua, Indonézia mak foin ba nasaun seluk hanesan Europa ka liu Portu Dili bá Singapura, Estadu Unidu Amérika , Austrália, Nova Zelándia no Alemaña.

Diretór Fernando Egidio dehan, bainhira kompradór sira la sosa kafé husi komunidade bele afeta ba rendimentu uma laran, tanba uma-kain balun, liuliu iha Munisípiu Ermera maka depende tebes ba kafé.

“Ha’u bolu ona esportadór kafé sira ne’ebé mak servisu iha Asosisaun Kafé Timor-Leste, nune’e iha tempu tempu badak sira bele sosa kafé atu labele prejudika liu ita-nia agrikultór kafé sira”, nia akresenta.

Tuir peskiza ne’ebé hala’o husi MAP iha 2010 no 2011 hatudu katak iha família balun maka rendimentu uma-kain depende porsentu 80 to’o 90 husi kafé.

Kona-ba folin kafé, nia esplika iha kafé oin tolu hanesan kafé fuan mean kilograma ida sentavu 25 to’o 35, kafé tanduk (kopi tanduk) kilograma ida $1 to’o $1,75  no kafé moos kilograma ida ho presu $3,9.

“Iha Timór ne’e, agrikultór kafé na’in-1.500 maka hetan sertifikasaun husi Nova-Zelandia, ne’ebé ninia folin kafé mínimu ba kilograma ida $3,9 no folin másimu bele entre $5 to’o $7 kada kilograma,” nia subliña.

Nia konta tuir, produsaun kafé iha Brazíl a’as tebes maibé osan Brazíl (BRL) nia valór monu hasoru Dolár Amérika, ne’ebé nasaun ne’e fa’an kafé ho folin baratu, tanba ne’e afeta ba merkadu internasionál inklui folin kafé iha Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here