Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio  Paixão Bano. Imajen Tatoli/António Gonçalves

DILI, 15 juñu 2020 (TATOLI)–Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio  Paixão Bano, prepara ona ekipa ida atu halo auditoria ba servisu Prezidente Autoridade Sesante, José Luis Guterres ‘Lugu’, iha semana dahuluk molok hahú halo servisu.

Notísia Relevante: Prezidente Repúblika Fó Konfiansa Tomak ba Arsénio Lidera RAEOA

“Iha semana dahuluk, ha’u sei hare lai kona-ba ema bara-barak ne’ebé Prezidente Autoridade RAEOA sesante, José Luis Guterres ‘Lugu’,  rekruta. Ha’u mós presiza audit ida, atu bele haree kona-ba servisu tomak ne’ebe la’o iha fulan hitu nia laran ne’e,” dehan Arsénio Bano ba jornalista sira hafoin hala’o audiénsia ho Prezidente Repúbkika, Francisco Guterres “Lú Olo”, iha Palásiu Prezidensiál Nicolau Lobato, Bairrupité, Dili, segunda ne’e.

Nia promete, iha semana ida-ne’e nia laran hakarak atu garante funsionamentu autoridade RAEOA, hosi edifisiu iha Faról Dili to’o iha Oé-Cusse. Tanba ne’e, nia husu ba populasaun Oé-Cusse tomak atu hakmatek. 

“Ema hotu tenke servisu hanesan baibain. Vida institusionál tenke la’o normál fila-fal. Ha’u tenke haree saida maka presiza halo,” nia hateten.

Arsénio Bano mós hato’o ona ba Primeiru-Ministru, Taur Matan Ruak, katak Oé-Cusse tenke sai duni modelu no nia rasik presiza apoiu hosi Mari Alkatiri.

Antes ne’e, eis Xefe Gabinete Prezidente Autoridade RAEOA, Silvério Pinto Baptista, hateten maski iha Lugu nia tempu la simu dokumentu ida hosi autoridade ne’ebé antes ne’e lidera hosi Arsénio Bano nu’udár Prezidente Autoridade interinu, maibé Silvério orienta ona diresaun hotu iha RAEOA atu prepara relatóriu hodi entrega ofisialmente ba autoridade foun iha tempu badak.

Notísia Relevante: Ohin, Lugu Entrega Edifisiu ZEESM Faról ba Ekipa Tranzisaun PA Arsénio Bano

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here