Reitór Semináriu Menór Nossa Senhora de Fátima Balide, Dili, Pe. Angelo Salsinha. Imajen Tatoli/Cipriano Colo.

DILI, 13 juñu 2020 (TATOLI)–Tuir planu, Semináriu Menór Nossa Senhora de Fátima Balide, Dili, sei hahú hikas prosesu aprendijazen iha segunda (15/06) aban.

Reitór Padre Angelo Salsinha informa, semináriu hein hela desizaun h0si Governu liuliu Ministériu Edukasaun Joventude no Desportu (MEJD), oinsá reativa hikas prosesu aprendijazen. Semináriu rasik, nia dehan, hala’o hela ninia preparasaun tanba Arsebispu Arkedioseze Metropolitana Dili, Dom Virgílio do Carmo da Silva, SDB, mós konkorda ona atu reativa fila-fali.

Padre Angelo hatutan, tanba oras ne’e daudaun sei iha hela situasaun emerjénsia, nune’e tenke kumpre nafatin regra sira hanesan distansiamentu sosiál, entaun Semináriu deside hodi hahú uluk ho grupu ida kompostu hosi estudante terseiru anu no anu Propedeútiku mak tama uluk.

“Ita halo sistema hanesan kuarentena. Bainhira sira mai, ita tenke kuidadu atu labele iha kontaktu fízika no ita kria uluk kondisaun. Ita mós fó hatene ona ba profesór sira atu halo rezumu ba matéria sira, nune’e durante períodu dahuluk ne’e, materia sira rezumida no estudante ka seminarista sira bele kapta ona buat ruma. Mekanizmu ne’e, sei  ajuda tebes, hafoin ita bele haree períodu mai fali, sira primeiru no segundu anu bele tama fali,” Padre Angelo esplika ba Agência TATOLI iha Balide, sábadu ne’e.

Padre Angelo mós informa, antes ne’e Semináriu kontaktu ona ho ekipa COVID-19 ninian, atu mai halo screening ba estudante sira inklui dezinfetante ambiente semináriu tomak.

Kona-ba distansiamentu sosiál no fízika, reitór ne’e hateten, iha semináriu laiha problema tanba sala de aula ida, iha ema na’in-20 to’o na’in-25 de’it no balun ema na’in-18 de’it.

“Semináriu mós preparadu katak, bainhira sistuasaun COVID-19 iha rai laran iha situasaun perigu, semináriu sei hola desizaun atu halo de’it rezumu ba matéria sira no haruka estudante sira fila-fali ba estuda iha uma. No, bolu fali sira primeiru ho segundu anu mai fali, mestre sira halo tan rezumu ba matéria no haruka sira fila ba estuda iha uma de’it,” nia hateten.

Oras ne’e daudaun, nia informa, totál alunu iha Semináriu Balide hahú hosi primeiru to’o terseiru anu, inklui klase  Propedeútiku hamutuk ema na’in-196. Padre Angelo hateten, iha primeira faze ne’e klase rua mak sei tama uluk maka hanesan terseiru anu ho klase Propedeútiku, katak metade hosi ema na’in-196 mak tama uluk.

Nune’e mós prefeitu estudu Padre Adérito de Sávio Sequeira ne’ebé hare kona-ba estudu no kuríkulu hateten, semináriu adopta kuríkulu rua, ida hosi edukasaun nian no ida seluk hosi Uma Kreda ninian.

“Iha ne’e, semináriu hanesan mós eskola sekundáriu jerál nian, ita adopta kuríkulu edukasaun nasionál nian. Entaun, primeiru to’o terseiru anu ita tuir ministériu edukasaun nian. Ne’e ita iha matéria siénsia sosiais hanesan sosiolojia, ekonomia, istória, jeografia, língua tetum, língua Inglés, língua potugéza, relijiaun, teknolojia multimedia, desportu, ho siénsia naturais sira mak hanesan fízika, biolojia, kímika, matemátika, sidadania, ho tan língua Melayu,” Padre Adérito esplika.

Semináriu Menór, hahú husi primeiru to’o terseiru anu, hatama mós matéria haat tanba ezijénsia hosi uma kreda nian mak hanesan língua Latina, Liturjia, katekeze no múzika.

Kona-ba klase propedeútiku, nia dehan,  semináriu uza matéria sira ne’ebé tuir kuríkulu Uma Kreda nian mak hanesan lójika, retórika, introdusaun Bíblia, língua Latina, língua Portugeza, língua Ingleza, istória Timor, Istória Igreja, istoria espiritualidade, múzika, Jornalizmu, análiza sosiál,  katekeze ho relijiaun.

Entretantu, Professór sira iha semináriu Balide hamutuk 40, permanente hamutuk na’in 14,  sira seluk ne’e kontratadu no voluntáriu.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here