Komunidade sira iha sede suku Fatuhada wainhira forma hodi simu ona subsidu 200 dolar nebe governu foo tanba implementasaun Estadu Emerjensi durante fulan rua relasiona ho virus Corona,Imajen/Antonio Goncalves

DILI, 13 juñu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago 11:00:45Exposto, agradese no apresia tebes ba benefisiáriu ka família uma-kain ne’ebé hakarak kontribui ba Estadu Timor-Leste hodi lasimu subsídiu $200.

“Ha’u agradese no apresia tebes ho benefisiáriu sira ne’ebé ho rendimentu $500 maibé sira lasimu no hakarak atu kontribui ba rai ida ne’e no sira onestu duni ba dezenvolvimentu Timor-Leste nian hodi lasimu subsídiu $200,” dehan Rui Manuel Gago Exposto ba Agência TATOLI, iha salaun MSSI, Caicoli, Dili, sábadu ne’e.

Nia dehan sidadaun ida ne’ebé hakarak kontribui ba dezenvolvimentu nasaun ne’e nian mak tenke onestu ba realiadade ne’ebé mak nia iha.

“Ema barak mak halerik hela ba hahan ne’ebé husik ita oferese ba sira ne’ebé mak laiha duni ka presiza duni atu hetan apoiu hosi Governu,” nia subliña.

Diretór Jerál MSSI ne’e akresenta tan, saláriu fulan-fulan $501 sei garante ba nesesidade loron-loron nian maibé ba ema balun ne’ebé mak loron-loron tenke sai buka mak foin sustenta. Tanba ne’e mak hanoin atu apoiu de’it ba sira ne’ebé laiha kbiit iha situasaun agora.

Tuir nia, bainhira Estadu no Governu ida-ne’e atu implementa programa subsídiu $200 ba agregadu familiar ho nia objetivu ida katak iha situasaun pandemia COVID-19 empreza barak mak taka no hapara nia traballadór inklui halo redusaun ba saláriu traballadór nian.

“Ho nune’e, Governu ho nia programa no objetivu atu apoiu família uma-kain iha situasaun COVID-19 nia-laran tanba empreza barak mak hasai nia traballadór no hamenus saláriu traballadór sira-nia no mós ita-nia inan-aman sira ne’ebé negósia iha merkadu mós sasán la folin no laiha rendimentu hodi sustenta nesesidade báziku ba família ida,” nia esplika.

Nia dehan, iha Estadu Emerjénsia ba COVID-19 iha primeiru ne’e limita tebes negosiante sira atu halo movimentu, tanba ne’e Governu hanoin katak fasilita subsídiu uma-kain ne’ebé rendimentu menus hosi $500 no negosiante sira iha merkadu no dalan ninin.

“Governu atu taka lakuna rendimentu família uma-kain ne’ebé menus ne’e, ho subsídiu $200 ba kada uma-kain maibé ba ema ne’ebé nia kondisaun rendimentu menus hosi $500. Rendimentu hosi $501 labele simu,” nia dehan. 

Pandemia COVID-19, nia relata, Governu la haree ba COVID-19 de’it maibé haree mós ba ema ne’ebé laiha aihan ba loro-loron nian, tenke sai mak hodi buka moris hodi han-hemu ba loron ida-nian.

“Ha’u hakarak husu ita atu fó apoiu ba ema ne’ebé loro-loron buka mak han-hemu ka ba sira ne’ebé mak loro-loron simu $501 ba leten. Ita mós tenke tau prioridade ba asuntu sira ne’e,” dehan Diretór ne’e.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here