METINARO, 12 juñu 2020 (TATOLI)- Lider Karizmátiku, Kay Rala Xanana Gusmão, kontente bainhira observa direita populasaun sira liu-liu ferik no katuas sira iha Suku Mantelão, Postu Administrativu Metinaro, Munisípiu Dili, ne’ebé entuziazmu simu subsídiu $200 ba kada uma-kain husi Governu.
Notísia Relevante : Xanana Kontinua Halo Asaun Solidariedade ba Kbiit-Laek Sira
Xanana dehan, subsídiu ne’ebé Governu fó atu bele ajuda sira uza osan hodi sosa netik bua no malus, inklui ai-han ruma no uza ba nesesidade importante seluk durante implementasaun estadu emerjénsia.
“Waoo, imi forma barak loos ne’e, simu ona katuas botak (osan), ha’u kontente tebes, ha’u mós hakarak ba forma simu hotu ha’u nian, maibé lista naran la iha. Importante liu maka imi uza abatoak (osan) ne’e sosa netik bua no malus no sosa hahán ba situasaun ida ne’e,” dehan Xanana, bainhira konversa ho populasaun sira ne’ebé forma simu osan iha Sede Suku Mantelão.
Iha oportunidade ne’e, Xanana apela ba populasaun sira atu kontinua próteze-aan husi propagasaun surtu Coronavirus ka COVID-19.
Iha fatin hanesan, Xefe Suku Mantelão, Sergio Assis Lopes Sarmento Dias ,dehan populasaun sira sente kontente tebes ho subsídiu $200 bele uza ba sira nia presiza loron-loron nian.
“Ami agradese avó haree rasik, iha suku ida ne’e hahú segunda too mai ohin, ita nia reinu sira entuziazmu hodi forma tuir liña ho distánsia fíziku para hodi lori sira nia kartaun kompletu hodi simu osan,” nia hatete.
Tuir lista família uma-kain husi Suku Mantelão ne’ebé naran aprovadu husi Ministériu Solidariedade Sosiál no Inkluzaun (MSSI) hamutuk 453, kompostu husi aldeia-neen (6) hanesan, Beesahe, Birarahumata, Haslaran, Lebutun, Mantelão, Manulara ho total orsamentu $90.600.
Iha parte seluk, Prezidente Autoridade Munisípiu Dili, Gaspar Soares, ne’ebé mós asiste diretamente prosesu pagamentu ne’e sente agradese no husu autoridade suku atu identifika lista naran família sira ne’ebé seidauk rejista bele hato’o ba Governu hodi buka solusaun.
Tuir observasaun Ajénsia Tatoli nota prosesu pagamentu hetan seguransa makas husi PNTL no populasaun sira atu ba simu osan tenke kumpre regra distánsia fíziku.
Jornalista : Eugénio Pereira
Editór : Francisco Simões
