Profesionál Saúde sira halo kampaña nasionál fase liman hodi prevene surtu COVID-19, iha areadór HNGV, kinta (14/05). Imajen Tatoli/António Gonçalves

DILI, 12 juñu 2020 (TATOLI) – Ministériu Finansa (MF) liuhosi Konsellu Jestaun Fundu COVID-19 simu ona proposta ne’ebé mak aprezenta husi Ministériu Saúde (MS), kona-ba suplementu remuneratóriu ba profisionál saúde sira ne’ebé presta servisu durante surtu COVID-19.

Maski nune’e, presiza hetan validasaun husi Sala Situasaun Sentru Integradu Jestaun Krize (CIGC, sigla portugés) no MF sei halo verifikasaun detallu ba konta bankária.

Koordenadór Jerál Sekretariadu Konsellu Jestaun Fundu COVID-19, Januário da Gama, informa dadus ba pagamentu lori ona ba CIGC atu halo validasaun no kualifika hirak ne’ebé elijível atu hetan subsídiu remuneratóriu.

“Sentru Intregadu haruka ona dadus ba Ministériu Finansa, espera segunda bele hetan despaisu ona husi Ministru Finansa hodi halo verifikasaun detallu ba konta bankária no bainhira konklui bele ona efetua prosesu pagamentu”, tenik Koordenadór hafoin reuniaun Konsellu Jestaun Fundu COVID-19 iha Salaun Auditórium Ministériu Finansa, Aitarak-Laran, sesta ne’e.

Atuál Diretór Jerál Planeamentu no Orsamentu MF ne’e informa, MS aprezenta proposta hamutuk miliaun 3,9, ba benefisáriu hamutuk 3.070, ne’ebé halo kobertu to’o munisípiu 12 inklui Rejiaun Adminitrativa Espesiál Oé-cusee Ambeno (RAEOA).

Suplementu remuneratóriu ba profisionál saúde sira ne’ebé presta servisu durante surtu COVID-19 no konsidera hanesan ema liña frente.

Ekipa liña frente ne’ebé tama proposta MS, kompostu husi médiku, doutór, enfermeiru no servisu apoiu tékniku sira seluk.

Nia klarifika, maski hanesan ministériu ne’ebé jere Fundu COVID-19, maibé MF sei labele halo buat ruma ba ezekusaun fundu bainhira ministériu no institusaun implementadu la hatudu sira-nia produtividade hodi prepara pedidu detallu mai MS.

“Públiku tenke hatene bainhira subsídiu ne’e tarde, Ministériu Finansa labele halo lalais tanba laiha konta bankária ne’ebé loloos. Tanba osan Estadu nian kuandu halo pagamentu presiza hatene nia alvu ne’e klaru. Benefisiáriu ne’ebé maka atu hetan presiza liuhosi konta bankária ida klaru”, nia akresenta.

Bazeia ba rezolusaun Governu, MS prevee montante fahe ba kategoria tolu no ne’ebé aplika ba profesionál sira ne’ebé konsidera hanesan liña frente no nia pagamentu sei sura kada loron.

Pagamentu $25 ba sira ne’ebé servisu iha fatin izolamentu no laboratóriu, $20 ba sira ne’ebé serbisu iha kuarentena no mós $15 ba sira ne’ebé serbisu iha administrasaun ka sira ne’ebé apoiu maibé laiha kontaktu direta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here