Primeiru-Ministru, Taur Matan Ruak prezide reuniaun Komisaun Interministerial kona-ba implementasaun medidas prevensaun no kontrolu surtu COVID-19, iha Palásiu Governu, sexta (12/06). Imajen Tatoli/Egas Cristovão

DILI, 12 juñu 2020 (TATOLI) – Primeiru-Ministru, Taur Matan Ruak, konvoka reniuaun ho liña Ministeriál  liga ba surtu COVID-19 no Sentru Intregradu Jestaun Krize (CIGC, sigla Portugés) hodi rona atualizasaun progresu servisu kondisaun atuál no fó orientasaun hahú prepara relatóriu ba prosesu luta kombate COVID-19.

“Primeiru-Ministru fó orientasaun atu hahú perpara relatóriu eskrita kona-ba prosesu hotu ba luta kontra COVID-19, atu ita aprezenta iha Parlamentu Nasionál iha tempu badak,” tenik Sekertáriu Estadu Komunikasaun Sosiál, Merício Juvinal dos Reis ‘Akara’, iha Palásiu Governu, sesta ne’e.

PM Taur mós orienta membru governu hotu atu apoia CIGC, nune’e iha semana ida ne’e nia laran tenke ezekuta planu no programa ne’ebé espesífiku liu ba Ministériu Saúde atu hahú lidera prosesu preparasaun no konsolidasaun kapasidade hanesan lojístika sira, infraestutura no rekursu umanu atu bainhira Estadu Emerjénsia ramata bele prontu hasoru situasaun foun hodi luta hasoru COVID-19. 

“Primeiru-Ministru mós fó hanoin katak hafoin Estadu Emerjénsia, ita labele haree ho matan sorin ba risku sira ne’ebé atu mai tanba   Estadu Emerjénsia iha limitasaun ba direitu sidadaun sira entaun ekipa fásil liu atu kontrola no jere,” nia subliña.

Tuir nia, bainhira Estadu Emerjénsia hotu, iha flesibilidade no liberdade barak ne’ebé sei fó risku oituan tanba surtu COVID-19 iha nível mundiál sei eziste.

Ho nune’e, Sekretáriu Estadu ne’e haktuir, Xefe Governu husu ekipa interministeriál no CIGC hamutuk ho sidadaun sira atu esforsu prepara-an hasoru períodu foun hafoin Estadu Emerjénsia.

Parte CIGC husu entidade relevante sira hodi kontinua reforsa nafatin estratejia atu  prevene no kombate COVID-19 ho nia sub estretejia mak kontinua reforsa iha fronteira terrestre atu ema labele tama arbiru no tama karik tenke ba hela iha kuarentena.

“Ita durante ne’e halo tiha ona estratejia hodi kombate COVID-19 ne’ebé konsege normaliza no rekupera kazu pozitivu COVID-19, husi na’in-24 sai zero. Ida-ne’e hatudu katak ita-nia estratejia kombate surtu susesu, maibé tenke kontinua reforsa no fortifika tan,” nia akresenta.

Enkontru ne’e, Xefe Governu orienta mós membru governu sira presiza ka’er resposabilidade ba asuntu importante sira no tenke servisu tuir tempu no labele dada tempu kle’ur.

Tuir governante ne’e, kona-ba opsaun estende Estadu Emerjénsia, iha diskusaun sei la’o hela tanba ne’e depende ba Primeiru-Ministru no Prezidente Repúblika.

Iha enkontru atualizasaun  estratejia luta kontra COVID-19 ne’e, partisipa husi membru governu ne’ebé ka’er asuntu liga ho prevensaun surtu, Xefe Estadu Maiór Jenerál Forsa Armada, Majór Jenerál Lere Anan Timur, Komandante Jerál Polísia Nasionál Timor-Leste (PNTL), Faustino da Costa no membru Sala Situasaun CIGC.

Jornalista: Florêncio Miranda Ximenes
Editora: Julia Chatarina

HAKEREK NO HATÁN

Please enter your comment!
Please enter your name here