Prezidente RAEOA-ZEESM,TL, Arsénio Paixão Bano. Imajen/Egas Cristovão

DILI, 12 juñu 2020 (TATOLI) – Prezidente Auotoridade (PA) Rejiaun Administrativu Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM,TL), Arsénio Paixão Bano, hateten durante nia mandatu sei fó prioridade ba setór sosiál atu hasai povu Oé-cusse husi izolamentu no ki’ak. 

“Ha’u hala’o observasaun ba orsamentu ne’ebé mak iha no ezekusaun orsamentu duodésimu hodi haree planu ba tinan oin, ba dezenvolvimentu ho prioridade nafatin ba setór sosiál hanesan infraesutura ne’ebé kombina ho eduaksaun, saúde, ekonomia baze, atu uma-kain ida-idak bele hetan ai-han, bee moos no  estrada ba área rurál tanba Oé-cusse porsentu 60 maka hela iha área rurál,” tenik PA RAEOA foun hafoin simu pose iha Palásiu Governu, sesta ne’e.

Nia nota, durante ne’e iha problema barak tebes iha Oé-cusse, maski iha PA sesante Marí Alkatiri halo buat barak ona, tanba ne’e nia promete sei kontinua obra hirak ne’e atu dezenvolve Oé-cusse no garante populasaun livre husi má-nutrisaun, asesu ba eskola no asesu ba bee moos inklui asesu ba infraestutura sira. 

“Semana oin ha’u sei fila ba Oé-cusse no porsentu 95 ha’u nia tempu iha Oé-cusse de’it. Ha’u hakarak loron-loron hatene ha’u inan-aman nia problema liuhosi loke-an durante oras 24 ba sé de’it iha ne’ebá hodi serví Oé-cusse no rai Timor-Leste to’o mandatu hotu,” Arsénio promote.

Tanba ne’e, nia sei simu krítika husi entidade hotu, nune’e bele dezenvolve-an sai di’ak liután.

“Ha’u simu no hanoin, maibé ha’u la haluha katak ha’u-nia misaun ne’e ida de’it maka Oé-cusse tenke sai husi izolamentu. Hodi kontinua hanoin ne’ebé Marí Alkatiri rai hela ba ami hodi halo rejiaun ne’e sai di’ak liután no kontinua misaun Timor-Leste atu liberta povu,” nia akresenta.

Ho nune’e, nia mós promote sei halo esforsu tomak atu  planu sira ne’e sai realidade hodi povu Oé-cusse bele sai husi izolamentu ho povu ne’ebé iha ekonomia di’ak no zero má-nutrisaun inklui bele asesu ba setór hotu.

“Ita hakarak kioske sira bele hetan osan no ema hotu bele hetan osan, bee moos, edukasaun di’ak no restaurante sira bele hetan osan no seluk tan mak importante atu normaliza Oé-cusse atu ema hotu bele iha osan tanba ha’u bá la fahe osan maibé bá kria kondisaun atu hetan osan,” Arsénio subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here