Vise Ministru ba Dezenvolvimentu Estratéjiku Saúde, atuál Ministru Saúde Interinu, Bonifácio Maucoli dos Reis. Imajen: TATOLI

DILI, 12 juñu 2020 (TATOLI)-Vise Ministru Estrantéjiku Dezenvolvimentu Saúde, Bonifácio Maucoli dos Reis, iha sesta ne’e hala’o vizita iha ba Sentru Saúde Becora hodi manifesta apoiu moral ba profisionál saúde sira ne’ebé servisu durante implementasaun Estadu Emerjénsia ligadu ho kazu COVID-19 iha Timor-Leste.

“Ami hakarak ko’alia oituan ho sira profisionál saúde sira iha Sentru Saúde Becora para fó forsa ba sira motivasaun para sira nafatin servisu hodi presta servisu ne’ebé di’ak ba komunidade liliu durante situasaun COVID-19,” dehan nia ba jornalista sira iha Becora ohin.

Durante sorumutu ne’e nota mós preokupasaun kona-ba menus rekursu umanu hodi suporta servisu iha Sentru Saúde ne’ebá.

“Ha’u hateten rekursu umanu ne’e iha maibé hein de’it para ita halo jestaun tanba iha ne’e la sufisiente liu no la másimu liu maibé importante mak oinsá sira jere rekursu umanu ida ne’e ho diak,” katak Maucoli.

Preokupasaun kona-ba formasaun ba rekursu umanu, nia hateten MS estabelese ona akordu ho UNTL atu profisionál saúde sira ho grau diploma I to’o III bele kontinua eskola filafali.

“Sira ne’ebé mak SPK ita hakarak hasa’e nivel baxarelatu ka diploma III para nune’e eleva sira-nia kapasidade no koñesimentu atu nune’e sira bele fila mai halo servisu di’ak liutan ba rai ida ne’e,”esplika Vise Ministru Saúde ne’e.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here