Koordenadór Jerál Sekretariadu Konsellu Fundu COVID-19, Januário da Gama. Imajen Tatoli/Egas Cristovão

DILI, 12 juñu 2020 (TATOLI) – Koordenadór Jerál Sekretariadu Konsellu Jestaun Fundu COVID-19, Januário da Gama, klarifika pagamentu suplementu remuneratóriu ba FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) ba konta bankária ida-idak seidauk bele realiza tanba mosu fallansu iha sistema bainhira halo transferénsia ba Banku Sentrál iha loron 9 juñu.

Pagamentu ne’e ba profisionál sira ne’ebé konsidera hanesan iha liña frente durante hala’o kna’ar iha ámbitu Estadu Emerjénsia ligadu ho prevensaun surtu COVID-19 iha Timor-Leste.

“Iha loron hirak liubá ha’u pronúnsia ona katak prosesu transferénsia pagamentu remuneratóriu ba FFDTL no PNTL, Ministériu Finansa (MF) halo ona transferénsia ba Banku Sentrál desde iha loron 9 juñu maibé bainhira ami haruka, imediatamente loron 10 tuir mai banku rejeita ho razaun konta bankária ninia detallu númeru ka IBAN balun sei iha fallansu,” dehan Januário da Gama hafoin reuniaun Konsellu Jestaun ba dala-hitu nian, iha Salaun Auditórium Ministériu Finansa, Aitarak-Laran sesta ne’e.

Proposta husi F-FDTL aloka orsamentu hamutuk millaun $1,8 ba pagamentu benefisiáriu hamutuk na’in-2.070 ba fulan-rua nian, no husi totál ne’e na’in-64 integra iha Sala Situasaun CIGC, ne’ebé hela de’it na’in-2.006.

Enkuantu proposta ne’ebé PNTL aprezenta ho totál benefisiáriu hamutuk na’in-4.063, ho ninia totál orsamentu ne’ebé aloka ba pagamentu benefisiáriu sira ne’e hamutuk millaun $3,6 ba fulan-rua nian, no husi totál ne’e na’in-47 mak integra iha Sala Situasaun Sentru Integradu Jestaun Krize (CIGC, sigla portugés).

Husi na’in-4.016 ne’ebé maka prosesa ona pagamentu maibé iha mós lista adisionál, ne’ebé aprezenta katak iha pesoál balun latama ona servisu, moras no la ativu ona, nune’e 400-resin maka hetan redusaun.

Atuál Diretór Jerál Planeamentu no Orsamentu MF ne’e hateten, iha loron 11 juñu, tuir kaledáriu Governu feriadu.

“Iha loron 11 juñu ita feriadu tanba loron boot maibé Sekretáriu Tékniku kontinua tama servisu nafatin hodi halo verifikasaun dadus ba konta bankária F-FDTL no PNTL ninian, no konfirma to’o ohin haruka filafali ba banku maibé sistema banku sei rejeita nafatin tanba kontinuasaun sei iha fallansu konta bankária,” nia akresenta.

Tanba ne’e, MF presiza halo ajustamentu ho baze tenke halo konfirmasaun dala-ida tan iha institusaun hanesan F-FDTL no PNTL.

“Dadus ida hanesan konta bankária ne’e, na’in maka institusaun sira ne’e. Tanba ne’e kuandu aprezenta konta bankária mai mak iha fallansu tekniku ruma, maka presiza informasaun laloos atu halo prosesu pagamentu sistema banku, liuliu bainhira ita hatama númeru ka letra balun maka sala mós sistema rejeita kedas,” nia esplika.

Nune’e, nia husu atu instituisaun sira presiza kuidadu bainhira halo verifikasaun ba detallu konta bankária.

Nia subliña, bainhira halo pagamentu labele halo transferénsia ba ema idaidak nian, maibé halo ba pakote ida hanesan ezemplu iha F-FDTL no PNTL iha benefisáriu hamutuk 200, tenke transfere dala-ida de’it, la haruka ketak-ketak.

Maski nune’e, nia rekoñese Sekretariadu Tékniku iha obrigasaun atu halo konfirmasaun ho instituisaun relevante hodi halo kruzamentu ba konta bankária.

“Prosesu sira ne’e ha’u hanoin obrigasaun ba ami Sekretariadu Tékniku. Ami maka tenke halo fali konfirmsaun ho parte ministériu implementadu liuliu ba F-FDTL no PNTL, hafoin halo kruzamentu didi’ak ba konta bankária sira ne’e tenke loloos, atu bele efetua fali transferénsia”, nia tenik.

Montante ne’ebé prevee iha rezolusaun fahe ba kategoria no iha rezolusaun ne’e valór ne’ebé aplika ba profesionál sira, ninia pagamentu sei sura kada loron.

F-FDTL no PNTL tama ba kategoria pagamentu kada loron $15, ne’ebé tuir rezolusaun mensiona grupu ne’e maka hanesan forsa, defeza, imigrasaun, kuarentena, alfándega, no sira ne’ebé servisu iha fronteira, aeroportu, portu no terrestre.

Jornalista: Antónia Gusmão

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here