Ajénsia Koica ajuda bee-mos ba komunidade afetadu inundasaun iha Taibesi, kinta (19/03). Imajen Tatoli/António Gonçalves

DILI, 12 juñu 2020 (TATOLI) – Ministru Obra Públika, Salvador Eugênio Soares dos Reis Pires, halo abertura ba enkontru inisiasaun Kick of Meeting no kompañia neen hodi selebra kontratu ba rekuperasaun obra Estadu iha área bee no saneamentu ne’ebé hetan estragu husi inundasaun iha fulan-marsu.

“Asina akordu ohin ne’e hanesan Kick of Meeting ba kompañia neen ne’ebé mak selesionadu atu halo obra emerjénsia ba estragu ne’ebé mak akontese iha loron 13 marsu 2020 ho kustu orsamentu $700.000, ba obra bee no saneamentu nian,” tenik Minsitru Salvador hafoin selebra akordu iha edifísiu Servisu Água no Saneamentu (SAS), Caicoli, sesta ne’e.

Hafoin inundasaun iha marsu, Primeiru-Ministru hasai despaisu liuhusi Konsellu Administrasaun Fundu Infraestrutura (KAFI) atu kria ekipa Task Force, ne’ebé kompostu husi liña interministeriál hanesan Ministériu Obra públika (MOP), Ministériu Planeamentu, Investimentu no Estratéjiku (MPIE), inklui ajénsia sira hanesan Komisaun Nasionál Aprovizionamentu (CNA, sigla portugés) no Ajénsia Dezenvolvimentu Nasionál (ADN), atu servisu hamutuk hodi halo levantamentu dadus no mós verifikasaun legalmente, bazeia ba lei aprovizionamentu artigu 92 no 94 kona-ba elizibilidade ba projetu ne’ebé mak bele mak tama hanesan kategoria emerjénsia.

Governante ne’e informa, husi totál obra 28, iha 16 de’it maka tama iha kategoria emerjénsia, 12 seluk, liuliu husi Diresaun Jerál Eletrisidade nian tama ba prosesu normál.

“Projetu emerjénsia 10 iha loron 8 juñu liubá, iha obra públika nian ba ponte no estrada, ha’u asina tiha ona no ita halo tiha ona Kick of Meeting agora hodi mobiliza sira atu halo obra iha terrenu no ohin mak realiza husi Diresaun Jerál Água no Saneamentu (DGAS) nian ba estragu iha lokalizasaun neen ne’ebé akontese rezulta husi inundasaun loron 13 marsu,” nia akresenta.

Ministru ne’e iha esperansa iha tempu badak kompañia sira sei mobiliza no halo obra ba durasaun tinan-ida nia laran tanba projetu ne’e la’ós konsidera hanesan projetu multi-anuál maibé hanesan projetu emerjénsia.

Governu husu kompañia sira sei presta sira-nia obrigasaun tuir kontratu no tuir kalendáriu ne’ebé mak estipuladu tiha ona.

Lista projetu emerjénsia bee no saneamentu ne’ebé asina mak hanesan projetu emerjénsia reabilitasaun sistema bee-moos iha Lahane, Munisípiu Dili, ne’ebé sei hala’o husi kompañia Sicola Unip.Lda, Rehabilitasaun kanu tranzmisaun no distribuisaun husi WTP Benamuk ba WTP Lahane, Munisípiu Dili kaer husi kompañia Lemo Timor Unip. Lda, Melloramentu sistema bee-moos iha Maloa, Suku Bairru-Pité, Dom Aleixo, Munisípiu Dili kaer husi kompañia Haksolok HJM Unip. Lda.

Nune’e mós Rehabilitasaun in-take no kanu transmisaun sistema bee-moos Lakoto, Muturade no Nahaek, Munisípiu Dili, kaer husi kompañia Amigo Unip. Lda, Konstrusaun Lutu hadulas uma panel instalasaun transformadór no kanu transmisaun iha Tuana-Laran, Munisípiu Dili, kaer husi kompañia Montez Frere Unip. Lda, no projetu emerjénsia ba kapitál Dili hafoin inundasaun iha munisípiu Dili, kaer husi kompañia Luliana Unip. Lda.

Seremónia asinatura ne’e partisipa husi Diretór Jerál Administrasaun Finansas, Januário Barbosa, Diretór Jerál Obra Públika, Rui Hernani ne’ebé hanesan Koordenadór Jerál ba ekipa Task Force ba rekuperasaun inundasaun loron 13 marsu 2020, Diretór Jerál Água no Saneamentu, Gustavo da Cruz, Diretór Jerál CNA, Aniceto do Rosário, Diretór Nasionál sira, inklui Emprezáriu Nasionál no funsionáriu DGAS.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here