Ministra Saúde , Odete Maria Freitas Belo. Imajen Tatoli/Egas Cristovão

DILI, 12 juñu 2020 (TATOLI)-Ministra Saúde, Odete Maria Freitas Belo, hateten daudaun ne’e Ministériu Finansa hahú halo ona verifikasaun ba dadus Profisionál Saúde hamutuk 3.070 ne’ebé maka durante ne’e servisu iha liña oin ba prevensaun surtu coronavirus hodi hetan subsídiu husi Governu.

Prosesu pagamentu sei halo husi Ministériu Finansa hafoin prosesu verifikasaun dadus ne’e ramata iha tempu badak.

“Horiseik(kinta-red) ami enkontru ho Sentru Integradu Jestaun Krize (CIGC-sigla portugés) relata dokumentu sira ne’e ba iha Ministériu Finansa depois Minsitériu finansa verifika hotu dokumentu hirak ne’e mak foin halo pagamentu ba liña oin sira,”informa, Odete Maria Freitas Belo , ba jornalista sira hafoin partisipa reuniaun Konsellu Ministru, iha Palacio do Governo Dili, ohin.

Tuir dadus ne’ebé maka MS aprezenta ba CICG no MF hamutuk profisionál saúde 3.070 kompostu husi Doutór, Médiku, Infermeira, no seluk tan.

“Iha pagamentu ne’e sei diferensa tanba pesoál saúde ne’ebé mak iha labaratóriu no Izolamentu $25 no ba sira ne’ebé mak servisu iha kuarentena $20 no ba sira ne’ebé mak servisu iha administrasaun $15,” Governante esplika.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here