Prezidente Komisan C, Deputada Maria Angelica Rangel. Imajen/Antonio Goncalves

DILI, 12 juñu 2020 (TATOLI)—Komisaun C (Finansa Públika) iha Parlamentu Nasionál sei konklui relatóriu no pareser kona-ba orsamentu millaun $268.8 no segunda-feira semana oin sei halo diskusaun iha plenária.

“Agora ami halo hela serbisu no atu konklui ona relatóriu no pareser ne’e no segunda-feira hodi halo diskusaun ho karáter urjénsia iha plenária,” Prezidente Komisaun C, Deputada Maria Angélica Rangel, informa ba jornalista sira iha resintu Parlamentu Nasionál, sesta ne’e.

Komisaun C simu proposta hosi Governu ho montante millaun $268.8 iha loron 10 fulan-juñu 2020 no oras ne’e besik finaliza ona relatóriu no pareser. Proposta Governu nian n’e’e husu ho pedidu karáter urjénsia hodi halo levantamentu hosi fundu petrolíferu.

Prezidente Komisaun C ne’e hateten, bainhira plenária delibera ho karáter urjénsia iha segunda-feira hafoin tama audiénsia públika durante semana ida ho Governu.

“Karik pasa iha segunda feira no sei halo aprovasaun finál ba levantamentu ne’e,” nia dehan. 

Orsamentu ho montante millaun $286.8 ne’e prevé ba kaixa tezouru no reforsa fundu COVID-19.

Aleinde ne’e, Deputada Maria Angélica hateten, ezekusaun Fundu COVID-19 ho montante millaun $150 antes ne’e tarde maibé oras ne’e hahú la’o daudaun ona.

“Maibé depois aprovasaun urjénsia ne’e, iha audiénsia ami sei husu ba sira katak ami atu fó fali osan maibé ami tenke haree nia ezekusaun oinsá,” Prezidente Komisaun C ne’e hateten.

Iha Rejimentu Parlamentu Nasionál (RPN) artigu 97 (Prosesu urjente) alínea   1 hateten   ba kualkuér projetu ka proposta lei ka rezolusaun bele uza prosesu urjente.

Nune’e mós alínea 2 dehan, inisiativa ba prosesu urjente kompete ba Deputadu sira, ba bankada parlamentár sira ka ba Governu.

Alínea 3 hosi artigu ne’e fundamenta pedidu ba urjénsia ne’e haruka ba komisaun kompetente, ne’ebé sei apresia iha prazu 24 oras nia laran, no tenke elabora pareser fundamentada.

Bainhira pareser ne’e elabora tiha, plenária sei delibera kona-ba urjénsia, no debate organiza husi Konferénsia Reprezentante Bankada Parlamentar sira-nian ne’ebé hakerek iha alínea 4 hosi artigu ne’e.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here