Imajen/Facebook.

DILI, 11 juñu 2020 (TATOLI)—Iha kinta lorokraik ne’e, iha tuku 15:00, lian avizu be lian hosi Toa boot ida-nia hun, halibur sarani sira hakbesik-aan ba Igreja Santa Teresinha do Meninho Jesus Bedois (Camea). Ema u’ain la’o nadodon hakbesik-aan ba lian ne’e nia hun.

Notísia Relevante: Prosisaun Kristu Nia Futar Isin no Raan atu Hatudu Fiar ba Maromak

Iha karreta, motor, no sarani ua’in hakonu lurón be nahe-aan iha Igreja Bedois nia oin. Iha karreta mutin ida be orna ona ho hena-mutin be nabilan, iha nia laran, fatin kabuar ida ho nia forma hanesan “krús” be nia kór osan-mean, hodi hatuur netik “Kristu Nia Futar Isin no Raan” ba laran.

Hein be hein. Lian ida mai hosi Toa ne’e, haliian orasaun kmanek kona-ba Kristu Nia Futar Isin no Raan. Sarani sira taka-liman iha hirus matan hodi hahú reza be reza. Sinál, prosisaun ba “Kristu Nia Futar Isin no Raan” hahú hala’o, hosi Bedois atu haleu Kapitál Dili—hosi lorosa’e ba loromonu hafoin haninin iha Jardin Nain Feto Lecidere, Dili.

Prosisaun foin hahú sai hosi Bedois, Rai Dili hanesan tanis be tanis. Kalohan nakukun. La kleur de’it, udan-rahun turu hahú habokon “Kristu Nia Futar Isin no Raan”. Maski udan, sarani sira la hakiduk. Hamutuk ho “Kristu Nia Futar Isin no Raan”, sira hahú la’o no vizita uluk priozioneiru sira iha Prizaun Becora. Maske vizita liu de’it maibé Arsebispu Arkedioseze Dili, Dom Virgilio do Carmo, SDB, foti liman-kuana hodi fó bensaun ba prizioneiru sira ne’ebé hamriik iha lutu besi nia laran ne’ebá ne’e.

“Prosisaun ne’e nu’udár biban atu hatudu ita-nia fiar ba Maromak, hodi husu tulun, bensaun, forsa no naroman ba ita no ba ita-nia rain,” dehan Dom Virgílio da Silva do Carmo, kinta ne’e.

Dalan sei naruk, prosisaun ne’e la’o iha dalan naruk hodi ba vizita sarani sira ne’ebé hela hakmatek iha Sidade Dili nia laran. Kalohan taka lalehan, halo Sidade Dili sai nakukun. Udan monu rai nafatin. Prosisaun mós la’o ba oin nafatin. Iha dalan ninin sira ne’e, sarani barak mak hein hodi bele hetan grasa no bensaun ua’in.

“Ho prosisaun ida-ne’e, fó biban ba sarani sira bele besik liután no sente katak Maromak besik liután ba sira. Liuliu iha tempu ida-ne’e, tempu Estadu Emerjénsia no situasaun COVID-19 ne’e nia laran,” Arsebispu haklaken.

Imajen Tatoli/Cipriano Colo.

Iha dalan ninin sira ne’e, sarani ua’in mak tuku tuur hodi hakne’ak. Maskiprosisaun ne’e la’o de’it iha udan laran, maibé sarani sira hein nafatin hodi tuir prosisaun ne’e iha ida-idak nia uma oin. Realidade hatudu katak sarani sira mós iha saudades ba Maromak atu tuir prosisaun ne’e maibé tanba situasaun Estadu Emerjénsia, sarani sira hili dalan hodi hamriik no hakne’ak de’it iha dalan ninin sira ne’e. Iha sira-nia liman, sira halakan lilin lolon ida be lakan no lakan.

“Ohin, iha prosisaun ne’e, iha dalan sira, sarani barak hein, hakne’ak hodi simu bensaun hosi Jesus Nia futar isin. Hakne’ak hatudu domin boot ba Jesus Kristu, halo devosaun, ida-ne’e hanesan manifesatasaun ne’ebé kapaas loos liuliu iha tempu susar ninia laran,” amu bispu hateten.

Tutuir dalan, sarani sira hakne’ek be hakne’ak. Tuir rute ba prosisaun ne’e, sarani sira hakne’ak tutuir dalan. Rute prosisaun ne’e, hahú hosi Igreja Bedois, Igreja Bekora, Kruzamentu Kuluhun, Kruzamentu Ospitál Nasionál Guido Valadares, Kruzamentu Top One, Kuartél Jerál Polísia Nasionál Timor-Leste (PNTL), Igreja Katedrál, Ponte Maloa, Kruzamentu Semináriu Maiór nia oin, Hudi-laran Elemloi, Ponte Komoro Trés, Golgota, Raikotu, Rotunda Komoro, Igreja Ai-mutin, Kuartél Jerál FALINTIL Forsa Defeza Timor Leste (F-FDTL), Palásiu Governu, Remata iha Monumentu Na’in Feto Lesidere, no taka ho Bensaun Santísimu.

Partisispa iha prosisaun ne’e, Sanseler Arkedioseze Dili, Padre Paulus Maya, Padre Sira husi arkedioseze Dili, relijiozu-relizioja sira, no sarani sira.

Prosisaun ne’e hahú hosi tuku 15:00 no ramata iha tuku 19:30, ne’ebé hetan seguransa másimu hosi Korpu eskuteiru Katólika arkedioseze Dili, Grupu Tunggal Hati Seminári Tunggal Hati Maria (THS-THM), no Polísia Nasionál Timor Leste (PNTL).

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here