Ministru Ensiñu Superiór, Siénsia no Kultura, Longuinhos dos Santos. Imajen Tatoli/Egas Cristóvão

DILI, 12 juñu 2020 (TATOLI)-Governu liuhosi Ministru Ensinu Superiór Siénsia no Kultura (MESSK), Longuinhos dos Santos, husu ba Dirijente Universidade Públiku no Privada atu kumpre regra distansiamentu sosiál, fíziku no instala ekipamentu fase liman ba estudante sira hodi prevene transmisaun surtu COVID-19.

Longuinhos hato’o pedidu ne’e relasiona ho Universidade Dili Institute Tecnology (DIT), UNPAZ no seluktan ne’ebé oras ne’e re-ativa ona prosesu aprendijazen ba estudante.

“Lei hatur momoos ona ita hare iha dekretu lei Etadu Emerjénsia hatete katak atu re-ativa universidade sira hotu tenke kumpre norma teknika liliu mantein distansia sosiál no uza nafatin máskara,” dehan Governante ba jornalista sira iha Palacio do Governo Dili, ohin.

Mantein distansiamentu sosiál, fiziku no uza máskara importante atu prevene transmisaun surtu COVID-19 ba estudante sira.

“Ita keta halimar, hanoin dehan ita liu ona husi prosesu primeiru livre ona husi COVID-19, maibé ita mós tenke antisipa ba etapa segundu nian, keta halo etapa segundu kona liu fali ida primeiru ne’e oinsá entaun ema hotu mak tenke iha konsiensia hodi kumpre nafatin regra sira,” tenik tan.

Durante ne’e MESSK servisu hamutuk ho Ministériu Saúde rega ona ai-moruk dezifentante ba edifísiu universidade sira balun iha Dili no sei kontinua halo iha futuru.

“Ministeriu Ensinu Superior no Kultura koordena ona ho Ministeriu Saúde Primária mak halo dezinfetasaun ba instituisaun balu hanesan Universidade Públiku no privada sira maibé balu mak seidauk priense saida mak sira bele halo hodi rekoopera,” katak Longuinhos.

Kona-ba planu atu instala tanke bee moos no tornera hodi fasilita estudante universidade sira hotu, Nia dehan Ministériu Saúde agora daudaun iha ona prosesu implementasaun.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here