Logo FONGTIL

DILI, 12 juñu 2020 (TATOLI)-Fórum Organizasaun Naun Govermentál Timor-Leste (FONGTIL), dekobre katak prosesu pagamentu subsídiu $ 200 ba uma-kain ne’ebé hala’o husi Banku Nasionál Komérsiu Timor-Leste (BNCTL-sigla portugés) ho Ministériu Solidariedade Sosiál no Inkluzaun (MSSI) ladun efisiente tanba la kumpre pontu importante haat.

Membru Konsellu Fiskál FONGTIL, Elizabeth Lino de Araújo, hateten pontu haat ne’e maka atendementu husi MSSI ladun másimu, tratamentu ba benefisiáriu la justu, la kumpre distansiamentu Fiziku tuir implementasaun Estadu Emerjénsia no la intende rekomendasaun husi komunidade sira.

FONGTIL hamutuk ho Pontu Fokál husi ONG 125 ne’ebé ejizte iha Munisípiu 12 inklui Rejiaun Administrativa Espesiál Oé-Cusse Ambeno rejista kestaun ne’e durante prosesu pagamentu ba benefisiáriu sira hahú iha loron 9 to’o 11 fulan-juñu ne’e.

Pontu dahuluk maka laiha esplikasaun klaru kona-ba dekretu lei nú 15/2020, 30 abríl ne’ebé hatur iha artigu 2 versiklu 2 la fó definisaun klaru ba populasaun ho rendimentu mensál liu $ 500 liu merese atu simu subsídiu ne’e ka lae.

Tuir nia loloos ne’e antes prosesu pagamentu ne’e la’o, Autoridade Lokál sira presiza fó introdusaun atu prienxe format substansia, reklamasaun no justifikasaun, prosesu pagamentu la’o kleur tanba kolokasaun pesoál pagamentu na’in ida de’it.

“Benifisáriu uma-kain sira ne’e iha ema ho difisiensia no ema ne’ebé baibain forma ona família iha tempu naruk iha ona oan maibé sira nia fica família sei hamutuk hela ho inan-aman. Loloos xefe aldeia sira tenke ajuda fasilita hodi hetan fica família,” deklara Elizabeth Lino de Araújo ba jornalista sira iha FONGTIL Caicoli, ohin.

Nune’e mós identifika benefisiáriu balun naran dobru iha lista pagamentu iha suku rua diferente, xefe suku balun koa subsídiu $ 10 kada benefisiáriu, no benefisiáriu ho rendimentu $ 500 balun konsege simu subsídiu refere.

“Iha mós failansu seluk seluk mak Funsionáriu Públiku balun sira-nia saláriu liu $ 500 maibé naran sai iha lista subsídiu.Loloos labele akontese hanesan ne’e tanba antes ne’e MSSI fó sai ona katak dadus sira ne’e sei hatama iha sistema hodi bele deteta,”nia kestiona.

Aleinde ne’e númeru kartaun eleitóral iha lista pagamentu la atulizadu ho kartaun orijinál.

Ikusliu prosesu pagamentu ne’e la kumpre distansiamentu fiziku hodi prevene transmisaun surtu COVID-19.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here