Estudante Naun Bolseiru iha Indonézia. Imajen/Abílio

DILI, 12 juñu 2020 (TATOLI) – Estudante Timor-oan naun bolseiru iha Repúblika Indonézia husu Governu tetu didi’ak subsídiu ne’ebé oferese, tanba sira la konkorda subsídiu $100 ba fulan-ida.

Benefisiáriu iha Indonézia ne’ebé sei benefisia subsídiu ne’e hamutuk ema na’in-1.575, tuir lista ne’ebé aprezenta husi Ministériu Negósiu Estranjeiru no Kooperasaun (MNEK).

Portavóz estudante naun bolseiru iha Indonézia, Abílio da Costa Freitas, lamenta ho planu Governu ne’ebé publika iha Jornál Repúblika iha loron 5 Juñu 2020.

Portavóz estudante naun bolseiru iha Indonézia, Abílio da Costa Freitas. Imajen/ Abílio

“Governu nia programa kona-ba montante subsídiu ba estudante iha nasaun ida ho nasaun seluk la hanesan, hahú husi $100  to’o $1.000, nune’e ami iha nasaun Repúblika Indonézia sente lamenta tebes ho montante ne’ebé fó sai iha Jornál  Repúblika, ne’ebé mensiona kada estudante ne’ebé hela iha nasaun viziñu sei simu $100. Ho montane osamentu sira ne’e, ami estudante  sente Governu halo deskriminasaun boot ida ba ami,” dehan estudante naun bolseiru ne’ebé daudaun ne’e halo estudu iha Jogja, Indonézia, liuhosi komunikadu imprensa ne’ebé Agência Tatoli asesu foin lalais ne’e.

Notísia Relevante: Estudante Naun Bolseiru husi Nasaun 13 Sei Hetan Subsídiu, Benefisiáriu Iha Indonézia 1.575

Antes ne’e, Prezidente Repúblika, Francisco Guterres ‘Lú Olo’ promulga Dekretu-Lei kona-ba subsídiu temporáriu ba sidadaun timor-oan ne’ebé hela temporária iha estranjeiru no Dekretu-Lei ne’e mensiona katak nasaun sira ne’ebé sidadaun timor-oan rezide sei hetan subsídiu temporária kada fulan durante krize surtu COVID-19.

Montante subsídiu ne’ebé atribui ba sidadaun timor-oan iha estranjeiru bazeia ba kustu moris kada nasaun nian.

Nasaun 14 maka tama iha lista atu hetan subsídiu maibé ikusmai MNEK kansela subsídiu ba Itália ho razaun estudante sira hela iha asrama.

Nasaun hirak ne’e kompostu husi Estadu Unidu Amérika (EUA) $1.000, España, Austrália, Portugál no Itália $500, Brazil, Cabo-Verde, Filipina, Malázia, Tailándia, no Vietname sei simu $150, Índia, Indonézia no Tazmania $100.

Nune’e, estudante ne’e husu ba Governu atu tetu didi’ak montante subsídiu ne’ebé aloka ba estudante iha Indonézia tanba nesesidade barak. 

“Ami estudante hakarak ezije ba Governu no Estadu atu tetu didi’iak montante osan ne’ebé aloka ba estudante sira iha rai-li’ur, liuliu Indonézia tanba nesesidade bázika presiza barak tebes no no subsídiu ne’ebé Governu fó $100 sei la rezolve no la garantia ba ami-nia moris iha nasaun viziñu ne’ebé afetadu ho pandemi COVID-19,” nia dehan.

Sira mós husu ba orgaun soberanu sira atu ko’alia netik lia-fuan ruma ne’ebé bele garantia sira-nia vida.

“Ami ezije ba Governu, Parlamentu Nasionál no Prezidente Repúblika Demokrátika Timor-Leste (RDTL) nian, atu ko’alia  netik liafuan ruma ne’ebé bele garantia ami estudante sira nia vida iha ema nia-rai. Ami eziji ba Governu atubele evakua lalais estudante sira, bainhira Governu nafatin mantein ba montante ne’ebé mak Governu aplika $100,” nia afirma.

Nune’e, estudante sira hato’o rekomendasaun ba Governu hanesan tuir mai: 

  1. Husu ba Governu no Estadu RDTL atu tau sériu haree situasaun estudante sira ne’ebé moris iha nasaun afetadu sira hodi garantia estudante sira nia vida.
  2. Husu atu hadi’a sistema servisu hodi atende estudante sira iha rai-li’ur nian problema viza, tratamentu saúde karik afeta COVID-19, no seluk tan.
  3. Presiza define loloos estudante ne’ebé atu hetan subsídiu tanba durante ne’e Governu la define klaramente kona-ba sé mak atu hetan loloos subsídiu.
  4. Husu atu aselera ona prosesu atendimentu ba asuntu estudante ninia subsídiu tanba estudante balun oras ne’e daudaun afetadu ho kondisaun atuál hanesan laiha osan, hahan no seluk tan.
  5. Ami eziji ba Governu atu haree no tau matan ba estudante sira nia kartu izin tinggal terbatas (KITAS) tanba estudante balun mak agora enfrenta hela ba sira nia KITAS no balun sira nia estudu hotu ona maibé sira labele fila tanba ita-nia fronteira taka.

Estudante iha Indonézia mós husu ba Governu Timor-Leste karik laiha solusaun di’ak ba sira-nia problema, sira prontu hakat fronteira terrestre maski Estadu bandu ona.

“Bainhira Governu Timor-Leste la iha solusaun di’ak ba ami-nia preokupasaun ne’ebé ami mensiona iha leten, maka ami prontu atu ba korta fronteira terrestre hodi simu kastigu husi ami nia institusaun Estadu RDTL nian rasik,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here