Ró Haksolok. Imajen/Dok. ZEESM

DILI, 12 juñu 2020 (TATOLI) – Prezidente Auotoridade (PA) Rejiaun Administrativu Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor Leste (ZEESM,TL), Arsénio Paixão Bano, informa nia parte simu ona orientasaun husi Primeiru Ministru (PM), Taur Matan Ruak katak Ró Haksolok ne’e sei toma konta husi Governu sentrál atu lori mai Timor-Leste.

“Ha’u rona ona orientasaun husi Primeiru-Ministru katak Governu sentrál mak sei toma konta ho apoia husi Marí Alkatiri. Governu sentrál hakarak avansa to’o Ro Haksolok mai iha Timor-Leste, agora sei iha situasaun COVID-19 ne’ebé adia oituan maibé Ró Haksolok ne’e tenke mai”, Tenik PA RAEOA, hafoin simu pose husi Xefe Ezekutivu iha Palásiu Governu, sesta ne’e.

Kona-ba atu aumenta osan, nia dehan presiza haree progresu ró ne’e oinsa ho ninia prosesu ne’ebé Prizidente sesante halo ona.

Ró ne’e daudaun iha sidade Figueirra da Voz, Portugál, tanba iha problema kapasidade finanseira husi kompañia Atlantic Eagle Ship Building, ne’ebé hanesan responsável ba konstrusaun Ró-ahi Haksolok.

Ró Haksolok ho kustu millaun €13,7, inaugura iha loron 26 maiu 2017 iha sidade Filguerra da Foz, Portugál no tuir informasaun sei to’o iha outubru 2017, maibé tanba problema internal husi kompaña Atlantic Eagle ship Building ho sub-kontratór maka to’o agora ró seidauk mai.

Ró ne’e rasik iha kapasidade atu tula ema na’in- 377 no karreta hamutuk 15.

Enkuantu prosesu konstrusaun Ró Haksolok ninia kontratu asina iha 2014 entre Governu no empreza portugés.

Kontrusaun ró ne’e konsege paradu maibé bainhira estabelese ZEESM, prosesu konstrusaun ró-ahi ne’e entrega ba Autoridade RAEOA maka responsabiliza.

Desizaun atu hili ninia estaleiru (fatin atu harii ró) hahú ho foti husi V Governu Konstitusionál ne’ebé lidera husi Kay Rala Xanana Gusmão nu’udar Primeiru- Ministru, tuir ninia reprezentante husi Ministru Transporte no Komunikasaun, Pedro Lay da Silva, ne’ebé selebra kontratu ho estaleiru Atlantic Eagle ship Building, Lda iha loron 22 setembru 2014.

RAEOA-ZEESM simu prosesu konstrusaun ró liuhosi transferénsia projetu no elokasaun orsamentu husi Governu sentrál ba Autoridade hodi transfere poder no alokasaun verba ne’ebé akontese entre Governu no Estaleiru Atlantic Eagle ship Building.

Atu garante implementasaun tuir espesifikasaun no padraun tékniku ba Ferry Ró Haksolok no assegura katak ró ne’e bele hetan rejistu internasionál, tuir rekezitu Governu Timor-Leste, maka RAEOA-ZEESM selebra kontratu supervizaun ba konstrusaun ferry ho instituto soldadura e Qualidade (ISQ) ne’ebé hanesan instituisaun ho esperiénsia liu tinan 50 ho konstrusaun ne’ebé kredénsial atu fiskaliza konstrusaun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here