Xanana Gusmão hakerek hela lista naran Antigu Kombatente Libertasaun Nasionál hamutuk na’in-114 ne’ebé reklama sira-nia direitu partisipasaun ba luta libertasaun nasionál. Imajen/Eugénio Pereira

METINARO, 12 juñu 2020 (TATOLI)- Antigu Kombatente Libertasaun Nasionál hamutuk ema na’in-114, ohin, aprezenta sira-nia  reklamasaun kona-ba sira-nia direitu partisipasaun ba luta ba Komandante Ein-Xefe FALINTIL, Kay Rala Xanana Gusmão.

Notísia Relevante : Avó-Feto Tinan-90 Hateten, Xanana Mak Reorganiza Funu To’o Ukun-Aan

Antigu Kombatente hirak-ne’e afirma ba Xanana katak dezde 2003 sira halo ona rejistu ba Komisaun Omenajen, Sekretáriu Estadu Veteranu Libertasaun Nasionál, maibé too agora naran seidauk taka sai. Mezmu, iha tinan hirak liubá Governu rasik rekoñese ona sira nia partisipasaun luta hodi entrega ona medulla kondekorasaun ba sira, maibé too agora sira seidauk simu subsídiu ruma.

Administradór Postu Metinaro, Fausto Soares Dias, deklara ema rezisténsia sira ne’ebé reklama naran rejista kedas iha t 2003 too agora naran  la sai, tanba lista naran foun ikus ne’ebé rejista 2009  ne’ebé balun sai ona, no balun seidauk.

“Ohin ne’e Lider Karizmátiku, Kay Rala Xanana Gusmão, bele rona direita reklamasaun husi Antigu Kombatente Libertasaun Nasionál ne’ebé partisipa iha rezisténsia. Lista naran balun sai partisipasaun luta iha Zero Trés (03) ka Rejiaun III, ne’ebé ohin sira aproveita tempu sira hato’o lista ba hamutuk na’in-114 hodi maun boot bele hatutan sira nia preokupasaun ba Governu ho Komisaun Omenajen,” hateten Fausto Soares Dias.

Nia hatutan, lista balun ne’ebé rejista iha tinan 2009 balun Komisaun Omenajen fó sai tiha, maibé sira ne’ebé too naran la sai reklama sira nia direitu kleur tebes ona.

Veteranu rezisténsia sira ne’ebé halo reklamasaun ne’e barak maka dedika ona sira-nia partisipasaun luta tuir grau 4-7, 8-14, no balun nu’udar estafeta FALINTIL.

Nia espera ho prezensa Komandante Ein-Xefe FALINTIL, Xanana Gusmão, ne’ebé halo kedas rejista bele hato’o lalais ba komisaun omenajen hodi halo identifikasaun ba lista naran ne’e.

Iha fatin hanesan, Xanana Gusmão,  promete sei lori lista ne’e hodi aprezenta ba Governu liu-liu Komisaun Omenajen hodi halo identifikasaun.

“Ha’u rejista de’it naran, depois sei aprezenta ba Komisaun Omenajen hodi haruka ekipa sira atu mai halo identifikasaun,” Xanana lia tun ba antigu kombatente hirak-ne’e.

Xanana dehan, too agora nia lakohi konsidera nia-aan hanesan veteranu, tanba iha prosesu luta naruk ne’e hetan apoiu husi povu tomak ne’ebé salva no fó han FALINTIL durante luta naruk too mai independénsia, Governu tenke rekoñese ema hirak ne’e ninia partisipasaun ba luta.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here