Diretór Exekutivu Assosiasaun Defisientes Timor-Leste (ADTL), Cesário da Silva. ImajenTatoli/ Egas Cristovao.

DILI, 12 juñu 2020 (TATOLI)-Asosiasaun Defisiénsia Timor-Leste, iha tempu badak sei distribui sasán nesesidade báziku hanesan ai-hán no fasilidade ijiéne  hodi apoiu ba populasaun ho kondisaun defisiénsia iha territóriu Timor-Leste.

Tuir planu ADTL sei oferese apoiu ne’e ba defisiénsia sira iha Postu Administrativu Maliana no Balibo Munisípiu Bobonaro, Munisípiu Baucau iha Postu Baucau Vila, Laga, Venilale, Covalima iha Postu Administrativu Tilomar no Suai Vila.

Iha Munisípiu Liquiça sei halo iha Postu Liquiça Vila, Dili iha Hera no Cristo Rei, Manatuto iha Postu Administrativu Laklo, Laleia, Manufahi iha Postu Fatuberliu, Same Vila, Munisípiu Lautem iha Postu Administrativu Lospalos, Lautem no Tutuala.

Diretor Ezekutivu Asosiasaun Defisiénsia Timor Leste (ADTL), Cesário da Silva, hateten totál populasaun ho kondisaun defisiénsia hamutuk 38.118 maka enfreta problema menus ai-han durante implementasaun Estadu Emerjénsia.

“Ami rekoñese katak husi númeru ema ho defisiénsia hamutuk na’in 38.118 iha territóriu laran tomak ne’e ami seidauk responde ka halo intervensaun ba to’o sira ida-idak nia fatin, ami foin mak halo intervensaun ho númeru ki’ik liu pursentu 25 de’it,” informa nia ba jornalista sira iha edifísiu Fórum Organizasaun Naun Govermentál Timor-Leste (FONGTIL), Caicoli, ohin.

Durante implementasaun EE dahuluk no daruak, ADTL la konsege distribui apoiu hotu ba defisiénsia iha Territóriu Timor-Leste tanba kumpre hela regra distansiamentu sosiál no fiziku.

“Situasaun ne’e lori ona maluk defisiénsia sira ba risku ida vuneravel liu iha sosiadade nia le’et no Piór liután mak durante Estadu Emerjénsia ne’e bele mosu tan aktu violentu ruma hasoru sira,”tenik tan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here