Estudante Estudante Eskola Ensino basiku Filial 12 Otubru Tasitolu Fase hela liman antes atu tama escola. Imajen/Antonio Goncalves

DILI, 11 juñu 1010 (TATOLI)-Koordenadór Eskola Ensinu Báziku Filiál Aituri-Laran, Vidal B. dos Santos, informa to’o kinta ne’e seidauk instala ekipamentu prevensaun surtu COVID-19 iha sira-nia eskola tanba seidauk simu osan konsensaun eskolár husi Eskola Bázika Sentrál Sergio Viera de Melo.

“Ami hato’o ona proposta ba Diretór EBS Sergio Viera de Melo husu atu forñese ekipamentu kona-ba prevensaun COVID-19 nian maibé, to’o agora ami seidauk hetan resposta ida,” nia klarifika ba Agência TATOLI, kinta ne’e iha Aituri-Laran Dili.

Tanba ne’e, Vidal husu ba Dirijente Ensinu Báziku Sentrál Sergio Viera de Melo, atu aloka ona osan konsensaun hodi fasilita sira atu sosa ona ekipamentu prevensaun COVID-19 hanesan tanke bee moos, torneira, sabaun no seluk tan antes re-ativa prosesu aprendijazen ba estudante sira.

Iha parte seluk, Koordenadóra Ensinu Báziku Filiál, Doque de Caxias Bemori, Eliza Martins, reforsa tan katak nia parte mós seidauk simu osan konsensaun eskolár husi Ensinu Báziku Sentrál Esperansa da Patria Becora, tanba ne’e afeta ba preparasaun liliu sosa fasilidade prevensaun coronavirus.

“Ami atu jere oinsá enkuantu buat hotu maihusi Sentru, agora ami hein de’it saida mak ami atu hetan hodi nune’e ami bele halo preparasaun ba eskola ne’e hodi responde padraun minimu ne’ebé fó sai ona,”tenik Eliza.

Entretantu, TATOLI tenta konfirma preokupasaun ne’e ho Diretór EBS Sergio Viera de Melo ho EBS Esperanca da Patria Becora maibé la konsege tanba sira-na’in rua la tama servisu.

Jornalista : Tomé Amado

 Editór     : Agapito dos Santos

HAKEREK NO HATÁN

Please enter your comment!
Please enter your name here