Diretór Kompañia China Harbour Timor, Lda, Wang Wei, Imajen TATOLI/Antonio Gonçalves

DILI, 11 juñu 2020 (TATOLI) – Diretór Kompañia China Harbour Timor, Lda, Wang Wei, hateten relasiona disputa rai iha Kaitehu, Suku Mota-Ulun, Postu Aministrativu Bazartete, Munisípiu Liquiçá, parte kompañia sei hein desizaun ikus husi Tribunál.

“Kazu Kaitehu nian sei nafatin hanesan iha tinan-2019 liubá, ne’ebé mak iha hela prosesu legál nia laran tanba ami Kompañia no Governu aprezenta ona ba Tribunál ho evidénsia ne’ebé mak forte kona-ba disputa rai ne’ebé hanesan propriedade Estadu. Evidénsia sira ne’e mos konfirma ho ami nia pozisaun antes. Ho nune’e ami hein hela rezultadu husi prosesu legál sira,” tenik Diretór kompañia ne’e hodi responde pergunta husi Agência Tatoli liuhusi email, kinta ne’e.

Notísia Relevante: China Harbour Simu Ona Karta Atu Kontesta Marino Enterprise

Diretór Kompañia Marino Enterprise, Edencio Soares nu’udar rekerente ba kazu liuhosi ninia advogadu, Pedro Eusébio Aparício de Oliveira, rekere ba Tribunál Distritál Dili (TDD) ho providénsia kautelár espesifíkadu ba restituisaun posse tuir artigu 317 kódigu prosesu sivíl kontra kompañia China Harbour, Lda, ho kapitál $10.000, ho númeru rejistu TIN 1190065.

Nune’e, karta husi TDD, NUC 0209/19. CVTDD ne’ebé emite iha loron 3 setembru 2019, haktuir Wang Wei iha tempu durante loron-10 nia laran atu entrega petisaun ka dokumentu inisiál hodi kontra faktu sira ne’ebé Edencio Soares, alega.

Jerente China Harbour asina karta kontestasaun iha loron 5 setembru 2019 no husu atu estende tan loron-lima nia laran hodi responde, enkuantu Tribunál aseita prolonga tempu hodi China Harbour hatama opozisaun ba providénsia kautelár iha 23 setembru 2019.

Ba kestaun ne’e, parte China Harbour hanesan parte rekeridu iha prosesu, hatama ona opozisaun ba providénsia kautelar no Governu nu’udar reprezentante Estadu mós hatama embargo de terceiro kontra alegasaun Edencio Soares iha 23 setembru 2019.

Iha momentun ne’e, China Harbour hatama mós evidénsia balun no analize legál ba Tribunál.

Sorin seluk, Advogadu Kompañia China Harbour Timor Lda, José Teixeira, hateten parte kompañia sei hein Tribunál atu hatán.

“Tuir kódigu prosesu sivíl ami hein agora Tribunál atu notifika kona-ba audiénsia atu rona ami-nia sasin sira,” nia akresenta.

Hatán ba sasin na’in hira mak China Harbour aprezenta, Advogadu ne’e dehan: “Ami- nia kliente prepara ona testemuña na’in-lima iha opozisaun, ba kestaun seluk ha’u labele fó komentáriu ona tanba prosesu sei la’o iha Tribunál.”

Kompañia China Harbour nu’udar kompañia ne’ebé envolve iha projetu Portu Tibar, ne’ebé hala’o atividade esplozaun fatuk iha rai área Kaitehu ho medida ektare 4,2 ba konstrusaun Portu Tibar.

Kompañia xineza ne’e hetan ona lisensa ambientál no mineira ba esplozaun fatuk husi parte Autoridade Nasionál Petróleu no Minerál (ANPM).

Iha loron 12 jullu 2019, lansa ona uzu esplozivu dahuluk hanesan parte ida atu garante seguransa obra no hamenus posível risku.

Iha seremónia ne’e marka mós prezensa husi Ministru Transporte no Komunikasaun, José Agostinho da Silva, Ministru Defeza no Ministru Interiór interinu, Filomeno Paixão, eis Ministru Agrikultura no Peska, Joaquim José Gusmão dos Reis Martins, Sekretáriu Estadu Ambiente, Demétrio do Amaral de Carvalho no eis Prezidente Repúblika, José Ramos Horta.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here