Embaxador Uniao Eropeia iha Timor Leste, Andrew Jacobs (liman los).Im asina akordu ho representante Oxfam, Cathy Ricards Imajen/Antonio Goncalves

DILI, 10 Juñu 2020 (TATOLI)–Uniaun Europeia ho OXFAM iha Timor-Leste, kuarta ne’e asina  ona nota intendimentu (MoU-sigla inglés) ida hodi lansa programa rai matak ba agrikúltor  atus ida iha Munisípiu Baucau hodi kuda ai-horis no halo kultivu floresta produtivu iha área desflorestadu ba prevensaun mudansa klimátika.

Objetivu husi programa ne’e maka atu fortalese ekonomia iha aldeia sira no sensibiliza kona-ba degradasaun ambientál ho ligasaun ba agro-floresta ho sertifikadu komérsiu karbonu internasionál.

UE apoiu orsamentu  millaun $ 3 ba programa  rai matak ne’ebé hola parte husi Global Climate Alliance + (GCCA +).

Embaixadór UE iha Timor-Leste, Andrew Jacobs, esplika programa kuda ai-oan ho tema “Ho Musan Ida” hala’o ona husi  2010 iha Baguia Baucau, no mós suku sira besik hanesan Afaloikai Uatulari, Uatucarbau no Luro Lautem.

“Ha’u sente orgullu tebes atu ohin lansa rai matak, Inisiativa ba ekonomia matak ida ne’e sei redús emisaun ba kárbonu mak provoka mudansa klimátika, sei lori rendimentu ba agrikultór Timoroan sira, halo reflorestasaun ba área mak ambientalmente degradadu no sei ajuda komunidade sira atu dezenvolve,” dehan Andrew Jacobs, hafoin asina MoU iha residensia Eis Prezidente Repúblika, José Ramos Horta, iha Metiaut Dili ohin.

Programa ne’e kombinasaun ho European Green Deal nu’udar estratejia rasik ba dezenvolvimentu ne’ebé haketek dezenvolvimentu ekonómiku husi uza rekursu sira atu labele halo emisaun líkidu ba gás ho efeitu estufa to’o 2050.

Andrew Jacobs, informa programa ida ne’e di’ak ba Timor-Leste tanba iha poténsia ba hasa’e ekonomia povu agrikultór.

“Agrikultura kárbonu ne’e situasaun manan ba Timor-Leste tanba iha poténsial atu aumenta agrikultór sira-nia rendimentu anuál no fasilita dezenvolvimentu ekonómiku lokál no mós sei lori benefisiu ba rai no ambiente no hadi’a seguransa alimentár,” nia hateten.

Projetu ne’e mós sei tulun TL atu kria Fundasaun Nasionál Kárbonu hodi servisu hamutuk ho Governu no setór privada para kria kárbonu ida seguru no boot nune’e bele hetan sertifikadu tuir padraun osan mean ba área florestál.

Inisiativa ida ne’e sei rezulta iha aihun 400.000 ho armazenamentu ba kárbonu liu tonelada 400.000. Husi ai-horis hirak ne’e sei fó impaktu pozitivu direta ba ekonomia  agrikultór 2.000 no ba membru família na’in 6.000 to’o 10.000.

Iha biban hanesan Jestóra husi Fundasaun ho Musan Ida, Leopoldina Guterres, hateten programa ne,e lori benefisia ba povu agrikultór iha Baguia tanba hasa’e ona rendimentu no halo redusaun ba kárbonu.

“Progarama ne’e hahú primeiru ho toos na’in 12 maibé tanba programa ne’e di’ak agora komesa iha ona komunidade sira barak mak involve,” nia dehan.

Ai-oan ho espesie hitu maka sira kuda hanesan mahoni, ai-teka, kameli, kakeu, ai-bubur, ai-ná no ai-nitas.

“Ai ne’ebé ami kuda ho objetivu halo reflorestasaun no nia funsaun importante liu mak supa ár fo’er iha atmosfera entaun ár foer ne’e ami fan iha merkadu internasionál no osan sira ami fan ne’e mak selu fali ba toos na’in sira,” katak nia.

Nia esplika prosesu faan ár fo’er ne’e kontrola liuhosi sistema GPS no halo formula hodi deteta kada tinan ba ai-horis ne’ebé supa ár fo’er ne’ebé maka  kada indústria boot sira prodúz, no husi rezultadu sistema GPS ne’e maka sei aprenzenta ba empreza  hodi selu kada tonelada folin $ 15.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here