Imajen Tatoli/Evaristo Soares Martins.

DILI, 10 maiu 2020 (TATOLI) —Partido Democrático (PD), ohin, selebra ninia aniversariu ba dala-19 (10 juñu 2001—10 juñu 2020) hodi haklaken katak PD kontinua defende interese komún hodi luta ba povu nia moris di’ak. 

Iha ninia intervensaun, Sekretáriu Jerál PD, António da Conçeição “Kalohan” hateten kamiñada PD nian to’o loron ida ohin eziste ona tinan 19, atu buka hanoin hikas razaun PD nia ezisténsia.

“Ezisténsia PD nian ba kauza komún ida ne’ebé povu tomak hakarak. Moris hodi mós fó moris ba nia povu. Katak, moris atu hadi’a no halo di’ak ba povu nia moris. Atu simplifika moris atu lori dezenvolvimentu ba ita-nia povu. Razaun hosi razaun lubun ne’ebé ita sei kaer-metin to’o ohin-loron katak kaer metin ukun rasik aan harii nasaun hosi baze,” Intervensaun Sekretáriu Jerál PD, António da Conçeição “Kalohan” iha ámbitu aniversáriu PD ba dala-19 iha sede Colmera, Dili, kuarta ne’e.

Nia haktuir, PD nu’udar povu ne’ebé afirma ukun rasik-aan unilateralmente iha 28 novembru 1975 maka afirmasaun polítika ida-ne’ebé hahú PD nia dezeju atu moris iha demokrasia no moris nu’udar povu demokrátiku.

Iha lala’ok istóriku ida-ne’e mak, tuir nia, PD mós moris rasik aktu sira-ne’ebé iha no mós ho influénsia li’ur ninian hodi konkista ukun rasik-aan.

Ho dalan ne’ebé povu Timor-Leste liu iha tinan 24 nakonu ho terus no mate, povu kontinua hamriik metin ba prinsípiu ukun rasik-aan, hodi mós hakilar kona-ba hahalok sira-ne’ebé viola timoroan nia direitu nu’udar povu tanba esénsia hosi demokrasia mak nune’e duni.

Partido Democrático nia isin no raan hanoin sira atu defende justisa, direitu umanu, direitu atu hetan moris di’ak no iha plurarizmu katak la’ós mesak, labele mesak, hanoin maka la hanesan iha Partido Democrático.

Nune’e, loron ida ohin. loron ida ba lideransa PD no mós estrutura tomak. Ezisténsia PD nian la’ós atu sai nu’udar korum muzikál ida atu nafatin kanta múzika ida-ne’ebé hananu partidu ida-nian maibé ezisténsia PD nian la’ós halo de’it diferensa ou sai deferensa de’it ba partidu seluk.

Hosi ezistensia PD ba tinan 19 ne’e, PD partisipa ona iha eleisaun lejizlativa dala-haat no eleisaun antesida dala-ida, nune’e mós PD partisipa iha eleisaun prezidensiál dala-rua ho Prezidente Fernando “La Sama” de Araújo. Partisipasaun PD nian iha eventu polítiku nian hirak ne’e marka ezisténsia PD nian no hatudu mós ita iha ne’ebé ona.

“Maibé iha etapa sira-ne’e hotu no mós iha espasu ne’ebé ita la’o to’o agora, ita mós rekoñese katak ita ladauk bele hatudu saida loos mak PD halo ona hodi dehan PD to’o ona iha-ne’e. Asaun espesifíka ne’ebé atu marka katak karateriza PD ita bele dehan sei abu-abu hela. Iha asaun barak ne’ebé PD partisipa tanba hola-parte nu’udar koligasaun maibé PD labele halo reklamasaun ruma ba PD nian hodi dehan PD to’o ona iha-ne’e,” nia dehan. 

Iha situasaun ida-ne’e, nia dehan, mantein ho prinsípiu “PD Ba Estadu” tanba ne’e saida mak PD halo, PD la reklama nu’udar PD nian mesak.

“Lideransa nasionál to’o munisípiu sente segundu xamamentu atu hametin-aan, hakuak-malu hodi loke fila-fali ita-nia dalan. Dalan tún ba baze nune’e ita bele afirma ba dala-rua iha segundu xamamentu ne’e, ita tenke book no ita tenke sai autór no ita tenke kaer ukun metin ukun aan,” nia dehan. 

Tanba ne’e, Kalohan husu deskulpa ba povu Timor-Leste tomak, espesialmente ba lideransa sira hosi nasionál, munisípiu ba to’o baze tanba la konsege jere deputadu na’in-lima hos bankada PD iha Parlamentu Nasionál.

“Iha ami-nia pozisaun ba votu no iha ami-nia deklarasaun sira. Diferensa ne’ebé ami halo hamosu problemátika iha partidu. Ha’u nu’udar sekretáriu jerál no mós nu’udar prezidente bankada, ha’u foti responsabilidade ba limitasaun ida-ne’e. La’ós inkapasidade maibé ho limitasaun, ohin, tinan 19 PD nia ezisténsia, PD hamriik hikas ho nia-aan rasik iha palku polítika iha Timor-Leste no sei hatudu postura ida-ne’ebé foun iha Parlamentu Nasionál. PD ita hotu nian, PD prezente no PD ba futuru,” Sekretáriu Jerál Partido Democrático ne’e haklaken.

Iha aniversáriu PD ba dala-19 ne’e, partisipa hosi Prezidente PD, Mariano Assanami Sabino, estrutura nasionál, estrutura munisipál no militante hosi partidu refere.

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here