Lansamentu livru Timor-Leste Green Climate Fund iha edifísiu Akait, kuarta (10/06). Imajen/Mídia-SEA

DILI, 10 juñu 2020 (TATOLI) – Sekretáriu Estadu Ambiente (SEA) liuhosi Autoridade Nasionál Disignada (NDA, sigla Inglés) halo lansamentu manuál Timor-Leste ho mekanizmu atu asesu Fundu Klímatika Verde (GFCGreen Climate Fund), ne’ebé dezenvolve husi United Nations Framework Convention on Climate Change (UNFCCC).

Objetivu husi lansamentu nee atu informa ba liña ministeriál inklui parseiru dezenvolvimentu sira atu hatene prosedimentu atubele asesu ba rekursu husi Fundu Klimátika Verde.

Sekretáriu Estadu Ambiente, Demétrio de Amaral de Carvalho, hateten Timor-Leste hahú foti asesu ba oportunidade husi internasionál sira, la’ós tamba Timor-Leste tenke husu osan maibé tanba mudansas klimátika.

“Ohin ita lansa manuál ida husi Autoridade Nasionál Designada, nune’e ita bele iha kapasidade di’ak liután ho ajénsia dezenvolvimentu sira ne’ebé servisu iha Timor-Leste no mós liña ministeriál sira hodi bele familiariza ho prosedimentu inklui atubele asesu ba fundu ne’e ho di’ak liutan,” tenik Sekretáriu Estadu Demétrio hafoin seremónia lasamentu iha edifísiu Akait, kuarta ne’e.

Tuir governante ne’e, NDA sai hanesan rekezitu importante atu asesu ba fundu internasionál ne’e hodi halo avaliasaun, indetifikasaun no dezenvolve Timor-Leste nia aplikasaun nasionál tuir perioridade.

Fundu Klimátika Verde ne’e iha tinan kotuk, Timor-Leste asesu ona ho totál millaun $22,4 liuhosi PNUD.

“Ita mós hakarak kada tinan bele hetan fundu ne’e barak liután tanba estragu ambientál husi mundansa klimátika ne’e la’ós pekadu ema Timór nian maibé erru husi nasaun boot sira ne’ebé hahú dezenvolvimentu iha dékada ikus ne’ebé la kuida ambiente ho di’ak,” nia subliña.

Seremónia ne’e partisipa husi Diretór Jerál Ministeriu Finansa, Diretór sira iha SEA inklui Diretór sira husi liña ministériál sira, no mós sosiedade sivíl no ajénsia dezenvolvimentu balun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here