Embaixadora Estadu Unidu Amérika (EUA) ba Timor-Leste, Kathleen M. Fitzpatrick. Imajen António Goncalves

DILI, 10 juñu 2020 (TATOLI)–Embaxadora Estadu Unidu Amérika iha Timor-Leste (TL), Kathleen M. Fitzpatrick, hateten relasaun entre Timor-Leste ho Estadu Unidu Amérika kontinua eselente no metin.

Kathleen ko’alia asuntu ne’e hafoin hala’o audiénsia ho Prezidente Repúblika (PR), Francisco Guterres Lú Olo, iha Palásiu Prezidensiál Bairrupité Nicolau Lobato, Dili.

Notísia Relevante: EUA Apoiu Ekipamentu Prevensaun COVID-19 ba CIGC

“Ohin, ha’u mai hasoru-malu ho Prezidente Repúblika hodi rona esplikasaun kona-ba situasaun polítika iha Timor-Leste. Agradese ba oportunidade ida-ne’e, tanba ami ko’alia mós kona-ba relasaun entre nasaun rua ne’ebé kontinua eselente. Ami iha relasaun eselente ho Timor-Leste desde independénsia no kontinua nafatin to’o ohin loron no ba future,” Kathleen hateten ba jornalista, kuarta ne’e. 

Nia dehan, durante audiénsia ne’e iha oportunidade atu esplika ba Prezidente Repúblika kona-ba apoiu hoi EUA, ba COVID-19 iha Timor-Leste hamutuk millaun $1.6.

“Orsamentu ne’e, aloka ba  iha projetu sira iha Timor-Leste hanesan projetu saúde, projetu kona-ba hola máskara ba komunidade, projetu kona-ba instalasaun fatin atu fase liman, projetu sira kona-ba dezinfetante iha fatin públiku sira, no apoia ministériu saúde no seluk tan,” nia esplika.

Alende ne’e, diplomata ne’e  mós esplika kona-ba kontinuasaun projetu sira EUA nian iha Timor-Leste, ne’ebé kompromete atu kontinua dezenvolve hodi fó apoiu ba Timor-Leste liuhosi Millennium Challenge Corporation, asisténsia iha seguransa no defeza.

“Entaun, importante atu ko’alia kona-ba relasaun entre EUA ho Timor-Leste,” nia subliña.

Kona-ba ne’e, nia hatutan, Prezidente Repúblika agradese ba EUA liuliu ba apoiu hodi luta kontra COVID-19.

Entretantu, Governu Estadu Unidus Amerika investe ona millaun $70  iha área saúde no liu millaun $540 durante tinan 20 nia laran ba Timor-Leste.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here