Prezidente Autoridade RAEOA-ZEESM,TL sesante, José Luís Guterres ‘Lugu’. Imajen Tatoli/Egas Cristovão

DILI, 10 juñu 2020 (TATOLI) – Prezidente Autoridade Rejiaun Administrativa Oé-cusse Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM, TL) sesante, José Luís Guterres ‘Lugu’, komprometidu katak sei kontinua fó ninia kontribuisaun ba nasaun ninia interese.

“Saida mak ha’u sei halo iha futuru maka hanesan ema ida envolve iha atividade polítika durante tinan barak, husi kedas fundasaun movimentu libertasaun iha tinan-1972 iha funsaun barak iha rai-liur hanesan frente diplomátika, mai rai-laran mós ha’u sei kontinua fó ha’u nia kontribuisaun mesmu oituan. Tanba ne’e ha’u hakarak fó kontribuisaun ba nasaun ne’e ninia estabilidade,” hateten Lugu liuhosi konferénsia imprensa ne’ebé hala’o iha sede ZEESM,TL, Farol, kuarta ne’e, hafoin desizaun Konsellu Ministru ne’ebé ezonera nia husi kargu PA RAEOA-ZEESM,TL.

Notísia Relevante: Governu Ezonera Lugu no Nomeia Arsénio Bano Asume PA RAEOA

Eis Ministru Negósiu Estranjeiru no Kooperasaun ne’e rekoñese, ema hotu bele halo polítika maibé presiza garante estabilidade nasaun ninian.

“Ita bele halo polítika no jera ita-nia diverjénsia, inklui haloopiniaun ho dame no estabilidade, ne’ebé sei fó kontribuisaun atu ukun iha ita-nia rain no labele halo ho violénsia no ameasa maibé presiza ukun ho dame no domin tanba povu presiza estabilidade atu sira konsentra ba sira-nia vida agrikultura nian ka vida seluk,” Lugu akresenta.

PA RAEOA sesante ne’e agradese ba funsionáriu RAEOA hotu no ekipa asesoria sira, nune’e mós seguransa pesoál sira ne’ebé maka durante fulan hitu akompaña nia ho di’ak hodi asume kna’ar.

Aleinde ne’e, eis diplomata ne’e agradese ba povu Oé-cusse liuliu autoridade lokál sira tanba bele simu ona nia ho di’ak durante mandatu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here