Prezidente Autoridade RAEOA-ZEESM,TL sesante, José Luís Guterres 'Lugu', akompaña hosi funsionáriu hala'o konferensia imprensa relasiona ho desizaun Governu ba ezonerasaun, ne’ebé realiza iha salaun enkontru ZEESM,TL, Farol, kuarta (10/06). Imagen Tatoli/Antónia Gusmão

DILI, 10 juñu 2020 (TATOLI) – Prezidente Autoridade (PA) Rejiaun Administrativa Oé-cusse Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM) sesante, José Luís Guterres ‘Lugu’, deklara durante mandatu nia parte hakarak halo mudansa iha rai Oé-cusse, maibé laiha oportunidade tanba foin asume kna’ar fulan-hitu tenke husik kargu ne’e.

Lugu hetan nomeasaun husi Primeiru-Ministru, Taur Matan Ruak, nu’dar PA RAEOA-ZEESM,TL no iha loron 13 novembru 2019 hetan pose husi Xefe Governu ba mandatu tinan-lima.

Eis Diplomata ne’e dehan, hafoin simu pose husi PM Taur, planu ne’ebé sai prioridade maka bazeia ba planu dezenvolvimentu mak iha ona no husi planu ne’e maka hakarak halo mudansa iha Oé-cusse katak hakarak povu atoni-oan moris di’ak.

“Hakarak lori bee moos ba komunidade iha área rurál, lori estrada di’ak, no lori empregu ba populasaun, nune’e mós hakarak halo konsultasaun ho autoridade lokál bainhira prepara proposta ba Orsamentu Jerál Estadu (OJE) RAEOA nian,” dehan Lugu liuhosi konferénsia imprensa iha edifísiu ZEESMS,TL, Farol, kuarta ne’e, hafoin desizaun Konsellu Ministru ezonera nia husi kargu atuál.

Notísia Relevante: Governu Ezonera Lugu no Nomeia Arsénio Bano Asume PA RAEOA

Tuir nia, antes ne’e autoridade lokál sira ladún envolve iha diskusaun sira relasiona ho planu ba preparasaun proposta orsamentu iha RAEOA rasik, tanba ne’e iha preparasaun OJE 2021 ba RAEOA nian, nia parte hakarak envolve autoridade lokál sira iha diskusaun ba preparasaun planu ba oin.

“Karik ha’u hetan oportunidade, ha’u atu hala’o servisu bazeia ba planu dezenvolvimentu ba rai Oé-cusse ne’ebé maka Programa Nasaun Unida ba Dezenvolvimentu (PNUD) ajuda halo no labele hanoin katak atu ba halo buat foun. Ami hakarak investimentu boot sira ne’ebé iha ona presiza mantein no hadi’a, hanesan Aeroportu Internasionál Rota do Sândalo ne’ebé investe ho osan millaun $100-resin maibé seidauk funsiona, hanesan fatin balun seidauk di’ak no presiza hadi’a, aleinde ne’e aeroportu seidauk hetan rekoñesimentu hosi Organizasaun Internasionál Aviasaun Sivíl (ICAO, sigla portugés), tanba ne’e mak problema,” Lugu subliña.

Maski nune’e, nia lakohi fó sala ba autoridade anteriór bainhira obra ida la’o ladun loos.

“Bainhira ha’u to’o iha ne’ebá (RAEOA) relasaun entre administrasaun iha xefe suku sira kuaze laiha. Iha parte seluk ita presiza sira atu vota maibé ita nunka bolu sira hodi fó ideia ba preparasaun orsamentu iha RAEOA rasik. Ida-ne’e ladi’ak iha ita-nia rain, tanba ne’e maka ami hakarak halo mudansa hotu maibé laiha tempu atu hadi’a situasaun iha rai Oé-cusse,” nia haktuir.

Eis Ministru Negósiu Estranjeiru ne’e nota katak bainhira asume kna’ar, nia haree ona kondisaun povu sira iha Oé-cusse.

“Ha’u haree ona kondisaun vida povu Oé-cusse nian ne’ebé terus tebes maibé ha’u iha tempu fulan-hitu de’it no laiha posibilidade atu hadi’a sira-nia moris tanba ita moris de’it ho orsamentu doudésimu. Husu Prezidente Autoridade foun atu haree didi’ak povu Oé-cusse ne’ebé laiha serbisu, estrada ba foho seidauk di’ak, no kondisaun seluk tan, espera bele halo di’ak,” nia salienta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here