Xefe Estadu Maiór Forsa Defeza Timor-Leste , Majór Jenerál Lere Anan Timur. Imajen/Antonio Goncalves

DILI, 10 juñu 2020 (TATOLI)–Xefe Estadu Maiór Jernerál FALINTIL Forsa Defeza Timor-Leste (F-FDTL), Lere Anan Timur, kontinua preokupa ho seguransa marítima ne’ebé to’o oras ne’e presiza tebes hetan atensaun hosi Governu.

Lere Anan Timur hatutan, tanba seguransa marítima fraku mak fó leet ba ró ilegal no legal iha halo operasaun iha tasi Timor ne’e hamutuk ró 200-resin/

“Desde Abril to’o agora. peska illegál ne’e barak tebes. Konforme informasaun ne’ebé ita-nia marineiru sira kapta ka hetan iha semana ida-nia laran, ró illegal no legal iha ita-nia tasi Timor ne’e hamutuk 200-resin,” Lere Anan Timur hato’o preokupasaun ne’e ba jornalista sira hafoin hasoru malu ho Prezidente Repúblika (PR), Francisco Guterres Lú Olo, iha Palásiu Prezidensiál Nicolau Lobato, Bairru Pité, Dili, kuarta ne’e. 

Kona-ba tasi mane, Lere  informa, iha  ró rua ka tolu ne’e desde Abril to’o oras ne’e kontinua nafatin kail ikan illegal iha ne’ebá.

“Agora ita atu ba halo oinsá. Ita nani mós la di’ak. Nani ba, dalaruma ema sona mate ita mós iha. Ita nia ró mós, kuitadu, agora ne’e ita-nia governu mak hatene. Ne’e mak ha’u hanoin katak, peska illegal ne’e iha beibeik la’os ida de’it. Maibé krime organizadu iha tasi laran mós iha nafatin tanba ita laiha kondisaun,” Lere esplika.

Tanba ne’e, mak lider másimu instituisaun defeza ne’e hato’o mensajen ba polítiku sira katak, akordu kona-ba tasi nian ne’e bainhira Timor-Leste laiha kapasidade atu garante seguransa, maka ema bele interven ba Tasi Timor, ne’e admite ka lei fó dalan ba Indonézia no Austrália bele interven.

Nune’e, ho orsamentu 2020-2021 ne’ebé oras ne’e VIII governu prepara no besik atu diskute ona, Lere hanoin katak, sei iha orsamentu atu sosa ró, nune’e bele halo patrullamentu ba tasi parte norte no tasi parte sul.

“Ha’u dehan bele, nusa maka labele. Nasaun sira seluk mós tinan 20 ne’e bele harii ona nia forsa naval ida. Ne’e maka hanoin katak, presiza prioridade ita tenke fó atensaun ba seguransa iha ita nia maritima,” Lere hateten. 

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here