Prosesu pagamentu iha Suku Ililai, Postu Administrativu Lautém, Munisípiu Lautém. Imajen/Facebook.

DILI, 10 juñu 2020 (TATOLI)–Diretór Sentru Solidariedade Sosiál no Inkluzaun Munisípiu Lautém, Paulo Pinto informa, ekipa integradu ne’ebé lidera hosi Sentru Solidariedade Sosiál no Inkluzaun, halo ona pagamentu ba benefisiáriu sira hamutuk família 888 iha munisípiu ne’e ho orsamentu $177.600,00 pursentu lima (5%).

Notísia Relevante: Preparasaun Atinje 90%, MSSI Munisípiu Lautem Prontu Halo Pagamentu

“Horisehik, Munisípiu Lautém hahú ona pagamentu, komesa husi postu administrativu tolu mak hanesan Postu Administrativu Lospalos, Postu Administrativu Lautém, no Postu Administrativu Tutuala. Provizoriamente ami labele fó detalla kada suku maibé ami hakarak fó sai de’it hosi pastu tolu nian, katak ami selu ona 888 familia ho nia orsamentu hamutuk $177.600,” Diretór Paulo Pinto ba Ajénsia TATOLI liuhosi telefónika, kuarta ne’e.

Nia dehan, ohin sei kontinua halo pagamentu iha psotu tolu ne’e, tanba seidauk hotu no foin hahú pagamentu iha horisehik (09/06).

Responsável Sentru Solidariedade Lautém ne’e hateten, ekipa integradu ba pagamentu iha Lautém enfrente difikuldade tanba pagamentu ne’e uza sistema online (tablet), ne’ebé iha área rurál susar asesu liña internet atu atualiza dadus foun.

“Ami mós enfrenta difikuldade tanba dadus la atualiza. Ami uza tablet ne’ebé presiza servisu online ho asesu internet maibé iha área rurál balun ne’ebé la asesu internet. Entaun, ita la konsege esplora hodi atualiza nafatin dadus foun. Provizoriamente ida ne’ebé atualiza ona mak temi ona iha leten ne’e,” nia informa.

Maski nun’e, diretór ne’e hateten, ohin sei kontinua halo pagamentu to’o loron sanulu fulan ida-ne’e, tuir kalendáriu ne’ebé trasa ona.

“Horisehik alende ita halo pagamentu, ita mós halo ona levantamentu dadus ba Postu Aministrativu Luro. Ohin, komesa halo ona pagamanetu ba benefisiáriu sira iha postu administrativu ne’e. Nune’e mós, ohin, ita ba halo levantamentu iha Postu Administrativu Iliomar no aban halo pagametu. Ita kontinua halo hanesan ne’e to’o hotu,” Paulo Pinto hateten.

Paulo mós esplika mekanizmu balun ne’ebé nia rasik inisia katak, bainhira iha suku sira ne’ebé maka populasaun uitoan liu hanesan Suku Eukisi no seluk tan, maka pesoál sira tenke fahe malu atu bele ajuda fali sira ne’ebé populasaun barak, nune’e aselera pagamentu ne’e la’o lais liután.

Membru PNTL Munisípiu Lautém deskansa hafoin hala’o seguransa ba pagamentu subsídiu $200 iha Suku Ililai. Imajen/Facebook.

Kona-ba seguransa, nia informa, la’o diak tebes tanba servisu hamutuk ho komandu PNTL Munisípiu Lautém nian, no desde hahú levantamentu, ekipa task force halo patrullamentu regulár liuliu Ofisiál Polísia Suku (OPS) sira prontu asegrua prosesu ne’e tomak iha terrenu.

Iha loron primeiru pagamentu, ekipa hetan reklamasaun 13 no sira ne’e balun naran la sai, balun naran la hanesan ho kartaun eleitorál no seluk tan.

“Kona-ba reklamasaun hirak ne’e, ita tau hamutuk hela, depois de pagamentu liu tiha loron 15 mak ami sei hato’o fila-fali relatóriu ba nasionál atu bele halo fila-fali konsiderasaun,” nia haktuir.

Entretantu, munisípiu Lautém iha família hamutuk 18.472 ho nia orsamentu $3,694,400.00.

 Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here