Oradór ho partisipante sira foto hamutuk hafoin diskusaun editór club ne’ebé organiza husi AJTL, ne’ebé hala’o iha salaun CI, Kintal Boot, kuarta (10/06). Imajen Tatoli/Rita Almeida

DILI, 10 juñu 2020 (TATOLI) – Prezidente Asosiasaun Jornalista Timor Lorosa’e (AJTL), Zevonia Vieira, enkoraja jornalista timor-oan sira atu diversifika asuntu kobertura ne’ebé liga ba prespetiva jéneru.

Ba asuntu ne’e, nia fó ezemplu kona-ba isu ekonomia, ne’ebé husi perspetiva feto no mane konserteza sei la hanesan, nune’e mós ema ho difisiénsia no grupu minoria sira, tanba ne’e ema oinoin nia-lian importante iha kobertura jurnalístika.

Prezidente Asosiasaun Jornalista Timor Lorosa’e (AJTL), Zevonia Vieira. Imajen Tatoli/Rita Almeida

“Hirak ne’e hotu fó hanoin ba AJTL atu isu hotu ne’ebé ho perspetiva jéneru bele akumula hanoin sira ne’ebé la hanesan hosi parte hotu,” dehan atuál editora mídia online, Neon Metin, hafoin hala’o atividade editór club ho tópiku promove reportajen sensibilidade jéneru iha sala redasaun, ne’ebé hala’o iha salaun Konsellu Imprensa (CI, sigla portugés), Kintal Boot, kuarta ne’e.

Sorin seluk, Bárbara Nazareth de Oliveira husi Konsultóriu Júridiku-Sosiál (JU,S) nu’udar oradór iha atividade ne’e, apela jornalista atu halo esforsu ne’ebé konsiente, nune’e bele toman-an ba asuntu sira ne’ebé liga iha sosiedade katak feto no mane iha direitu hanesan.

Bárbara Nazareth de Oliveira hosi Konsultóriu Júridiku-Sosiál (JU,S). Imajen Tatoli/Rita Almeida

Nia rekoñese situasaun ne’e hanesan luta naruk ne’ebé presiza maluk feto sira kontinua atu hamrik nafatin no haktuir lian ba ema sira hodi rona.

Nune’e mós, Prezidente CI, Virgilio Guterres, husu ba jornalista sira atu adapta hanoin ho sosiedade.

Tuir nia, jornalista presiza muda atetude no liberta hanoin, nune’e mudansa sira ne’e bele muda perspetiva jéneru iha meiu ambiente, sosiál, no bele refleta ita-nian sosiedade, liuliu luta ba moris di’ak.

Atividade kada fulan ne’ebé realiza husi AJTL ne’e hetan apoiu husi Programa Nasaun Unida ba Dezenvolvimentu (PNUD), Ajénsia Internasionál ba Kooperasaun Korea (KOICA, sigla inglés), inklui CI.

Oradór ba atividade ne’e mak Prezidente CI, Virgilio Guterres, Bárbara Nazareth de Oliveira no Xefe Redasaun husi diáriu Timor Post, Carlos Malilaka de Jesus.

Jornalista: Rita Almeida

Editora: Julia Chatarina

HAKEREK NO HATÁN

Please enter your comment!
Please enter your name here