DILI, 10 juñu 2020 (TATOLI)–Xefe Gabinete Prezidente Autoridade Rejiaun Administrativa Espesiál Oé-Cusse Ambenu (RAEOA), Silvério Pinto Baptista, hateten, iha tempu badak Autoridade RAEOA sei asina Memorandum of Understanding (MoU) ho Asosiasaun Defisiente Timor-Leste (ADTL). 

Notísia Relevante: Molok Pagamentu, Autoridade RAEOA Sei Loke Uluk Konta Bankária ba Kada Suku

Konteúdu hosi asinatura MoU ne’e, atu Prezidente Autoridade José Luís Guterres bele tulun ADTL liuliu halo advokasia ba sira-nia nesesidade espesífiku, hanesan asesibilidade ba edifisíu públiku sira.

“Horisehik, Prezidente Autoridade simu ita-nia maluk defisiente sira  (ADTL)  ne’ebé lidera hosi Cesário da Silva iha edifisiu Gabinete RAEOA Faról, Dili. Durante audiénsia, sira husu ba Prezidente autoridade atu tulun sira halo advokasia ba sira-nia nesesidade espesifiku, hanesan asesibilidade ba edifisísu públiku sira,”   dehan Xefe Gabinete Prezidente Autoridade Rejiaun Administrativa Espesiál Oé-Cusse Ambenu (RAEOA), Silvério  Pinto Baptista, ba Ajénsia TATOLI iha edifísiu gabinete RAEOA Faról, Dili, kuarta ne’e. 

Nia esplika, iha sorumutu ida ne’e, Defisiente Timor-Leste (ADTL) ne’e aprezenta preokupasaun grupu difisiente sira ne’ebe seidauk hetan atensaun másimu hosi Estadu no Governu.

Tanba ne’e, Prezidente Autoridade prontu atu tulun sira halo advokasia ba sira-nia nesesidade espesifiku sira ne’e, maibé Prezidente rasik sujere atu kooperasaun ne’e formaliza liuhosi asinatura MoU ida iha tempu badak.

“Prezidente hateten katak, Autóridade ho Asosiasaun presiza asina Memorandum Intendementu kona-ba Pontus importante ne’ebé parte rua sei implementa,” nia hateten.

Tuir planu, iha tempu badak, ekipa téknika parte rua sei tuur hamutuk hodi dezenvolve dokumentu ida-ne’e hodi bele asina.

Autóridade mós komprometidu katak konstrusaun ba edifísiu sira sei inklui fatin espesífiku ba ema sira ho difisiensia bele asesu ho fasil.

Entretantu, tuir dadus husi ADTL hatudu katak, númeru ema ho defisiensia iha RAEOA hamutuk 2.000-resin.

 Jornalista : Cipriano Colo

Editór       : Cancio Ximenes