Xefe Ekipa Téknika Responsável ba elaborasaun planu Rekoperasaun Ekonómika pós-COVID-19, Rui Augusto Gomes. Imajen Tatoli/Egas Cristovão

DILI, 10 juñu (TATOLI) – Konsellu Ministru aprova Projetu Rezolusaun Governu, ne’ebé aprezenta husi Primeiru-Ministru kona-ba kria Komisaun elabora Planu Rekuperasaun Ekonómika no nomeia eis Ministru Planeamentu no Finansas iha VII Governu Konstitusionál, Rui Augosto Gomes hodi lidera komisaun ne’e.

“Komisaun ne’e iha prazu másimu loron-60 nia laran hodi fó rekomendasaun ba Konsellu Ministru liuhosi aprezentasaun planu kona-ba medida hirak atu aprova no asaun hirak ne’ebé atu ezekuta hodi rekupera ekonomia nasionál, ne’ebé sistematizadu no organizadu iha planu rekuperasaun ekonómika,” informa Ministru ba Prezidénsia Konsellu Ministru, Fidelis Manuel Leite Magalhães, hafoin reuniaun ezekutivu iha Palásiu Governu, kuarta ne’e.

Notísia Relevante: Prezidente Repúblika Autoriza Rui Gomes Lidera Ekipa Rekoperasaun Ekonómika

Ekipa ne’ebé sei envolve iha komisaun ne’e maka husi Unidade Planeamentu, Monitorizasaun no Avaliasaun (UPMA), ministériu relevante, ajénsia internasionál, no setór privadu sira.

Servisu ekipa ne’e maka prepara planu ba rekuperasaun ekonómika tanba aspetu COVID-19 afeta ba ekonomia rai-laran.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here