Koordenadór Jerál Sekretariadu Konsellu Jestaun Fundu COVID-19 no atuál Diretór Jerál Orsamentu Estadu Ministériu Finansa, Januário da Gama. Imajen Tatoli/Egas Cristovão

DILI, 10 juñu 2020 (TATOLI) – Tuir Dekretu-Lei númeru 21/2020 kona-ba subsídiu ba estudante naun bolseiru sira iha rai-li’ur, determina taxa ba estudante timor-oan sira iha nasaun 14.

Nasaun hirak ne’e kompostu hosi nasaun Indonézia, Austrália, Portugál, Malázia, España, Filipina, Viename, Índia, Cabo-Verde, Estadu Unidu Ámerika (EUA), Tailándia, Itália, Tanzania, no Brazíl.

Maibé husi nasaun 14 ne’e, tuir proposta husi Ministériu Negósiu Estranjeiru no Kooperasaun (MNEK) katak esklui tiha Itália ho razaun estudante sira ne’e hela iha asrama madre sira nian.

“Proposta ne’ebé mak MNEK aprezenta mai loloos hamutuk nasaun 14, maibé hela de’it nasaun 13 tanba esklui tiha Itália. MNEK relata katak estudante timor-oan iha nasaun ne’e hela iha asrama madre sira nian, entaun la nesesita atu halo pagamentu,” relata Koordenadór Jerál Sekretáriadu Konsellu Jestaun Fundu COVID-19, Januáriu da Gama ba Agência Tatoli iha ninia kna’ar fatin, Ministériu Finansa, Aitarak-Laran, kuarta ne’e.

Prezidente Repúblika, Francisco Guterres ‘Lú Olo’ iha loron 5 juñu 2020 promulga Dekretu-Lei kona-ba subsídiu temporáriu ba sidadaun timor-oan ne’ebé hela temporária iha estranjeiru.

Tuir Dekretu-Lei ne’e katak nasaun sira ne’ebé sidadaun timor-oan rezide atu hetan subsídiu temporária kada fulan mak EUA $1.000, España, Austrália, Portugál no Itália $500, Brazil, Cabo-Verde, Filipina, Malázia, Tailándia, no Vietname sei simu $150, Índia, Indonézia no Tazmania $100.

Montante subsídiu ne’ebé atribui ba sidadaun timor-oan iha estranjeiru bazeia ba kustu moris kada nasaun nian.

Jornalista: Antónia Gusmão

Editora: Julia Chatarina

1 KOMENTÁRIU

  1. Relaciona ho Cancelamento ba nao bolseiro ba Estudante Nao Bolseiro iha Italia, Atu hateten deit katak Ami hirak nebe escola iha Italia ne’e laos hela Iha Asrama Madre sira, maibe ami hela iha Colegio, nebe tempo feriado la permite atu ami hela iha colegio

HAKEREK NO HATÁN

Please enter your comment!
Please enter your name here