Tanki bee ne'ebé monta iha fatin públiku hodi ajuda komunidade fase liman, hodi kombate Covid-29. Imajen UNICEF

DILI, 10 juñu 2020 (TATOLI)-Eskola Ensinu Sekundáriu 12 Novembru Becora, oras ne’e hahú halo ona instalasaun ba ekipamentu prevensaun COVID-19 hodi fasilita estudante no profesór sira bainhira re-ativa ona prosesu aprendijazen.

Adjuntu Diretór, Cansius Elo, informa ekipa téknika  iha ona prosesu finalizasaun  ba  instalasaun tanke bee moos rua hodi fase liman.

“Ami garante aban bele instala hotu ona tanba agora fatin atu rai tanke rua ne’e solda ona ho besi,”dehan nia ba TATOLI, iha Becora, ohin.

Atu prepara kondisaun hirak ne’e maka eskola refere uza osan konsensaun eskolár hodi sosa tanke ka profile bee moos rua, balde naton ualu, sabaun fase liman kaixa rua, aisar lima no seluk tan.

Kona-ba garantia distansiamentu sosiál no fiziku, nia dirijente sira sei buka jere rekursu ho fasilidade ne’ebé iha atu bele akumula hotu estudante hamutuk 2.000.

Eskola ne’e iha profesór hamutuk 65 ho sala aprendijazen 15 tanba ne’e difikulta atu fahe ba kada sala ema na’in 20 no hanorin durante oras rua lorloron.

“Antes ne’e kada sala akumula estudante 60 maibé ho padraun minimu ne’ebé fó sai ona husi Ministériu  Edukasaun sira sei jere ho di’ak tanba kada sala sei akumula ema na’in 20,”tenik tan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here